ବାରିପଦା(ନିରପେକ୍ଷ ଖବର) ତା-୨୧/୦୮-ବିଜେଡି ସଂଗଠନର ପୁନର୍ବିନ୍ୟାସ ଜାରି ରହିଛି। ଦଳର ସଙ୍ଗଠନକୁ ଆହୁରି ମଜବୁତ କରିବା ପାଇଁ ଦଳର ସାଙ୍ଗଠନିକ ପଦ ପଦବୀର ପୁନର୍ଗଠନ କରାଯାଇଛି। ଦଳର ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୪୫ ଜଣଙ୍କୁ ଦଳର ସମ୍ପାଦକ ଓ ୪୧ ଜଣଙ୍କୁ ଯୁଗ୍ମ ସମ୍ପାଦକ ଭାବେ ନିଯୁକ୍ତି ଦେଇଛନ୍ତିି। ଏନେଇ ଗୁରୁବାର ବିଜେଡି ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି।ପଦବୀ ସହ ସମସ୍ତ ନେତାଙ୍କୁ ଭିନ୍ନ ବିଭାଗର ଦାୟିତ୍ବ ଦିଆଯାଇଛି । ତେବେ ୪୫ ସମ୍ପାଦକ ଓ ୪୧ ଯୁଗ୍ମ ସମ୍ପାଦକ ତାଲିକାରେ ଯୁବବର୍ଗଙ୍କୁ ବିଶେଷ ଗୁରୁତ୍ବ ଦିଆଯାଇଛି। ଏଥି ମଧ୍ୟରେ ଆଠମଲ୍ଲିକ ମାଟିର ସୁଯୋଗ୍ୟ ଯୁବ ସଙ୍ଗଠକ ପ୍ରକାଶ କୁମାର ଡାଙ୍ଗଙ୍କ ଉପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଶ୍ୱାସ ରଖି ଦଳର ଛାତ୍ର ବ୍ୟାପରର ଯୁଗ୍ମ ସମ୍ପାଦକ ପଦବୀ ଦେଇଛନ୍ତି। ସୂଚନ ଅନୁଯାୟୀ,ପୂର୍ବରୁ ଶ୍ରୀ ଡାଙ୍ଗ ନିଜର ସାଙ୍ଗଠନିକ ଦକ୍ଷତା ବଳରେ ମୟୁରଭଞ୍ଜରେ ସାଧାରଣ ନିର୍ବାଚନ, ବିଜେପୁର ଉପନିର୍ବାଚନ, ପାଟକୁରା ଉପନିର୍ବାଚନ ଏବଂ ଅନ୍ୟାନ୍ୟ ପୌରାଞ୍ଚଳ ନିର୍ବାଚନ ପରି ପ୍ରମୁଖ କାର୍ଯ୍ୟକ୍ରମରେ ନିଷ୍ଠାର ସହିତ ଦଳର ସମସ୍ତ କାର୍ଯ୍ୟକ୍ରମ ସମ୍ପାଦନ କରିଛନ୍ତି। ଶ୍ରୀ ଡାଙ୍ଗ ପୂର୍ବରୁ ଛାତ୍ର ଜନତା ଦଳରେ ସାଧାରଣ ସମ୍ପାଦକ ଏବଂ ଯୁବ ଜନତା ଦଳର ସାଙ୍ଗଠନିକ ସମ୍ପାଦକ ରହିଆସିଛନ୍ତି। ମୁଖ୍ୟମନ୍ତ୍ରୀ ତାଙ୍କ ଉପରେ ଭରଷା କରି ଦେଇଥିବା ନୂତନ ଦାୟିତ୍ୱକୁ ସେ ଠିକ ଭାବରେ ତୁଲାଇବା ସହିତ ଭବିଷ୍ୟତରେ ଦଳର ସମସ୍ତ ନିର୍ଦ୍ଦେଶକୁ ମାନି କାମ କରିବା ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିକଟରେ କୃତଜ୍ଞତା ଜ୍ଞାପନ କରିଛନ୍ତି।
