ସ୍ୱାଧୀନତାର ୭୪ ବର୍ଷ ପରେ ବି ଏମିତି ଏକ ଗାଁ ଅଛି ଯେଉଁ ଗାଁ କୁ ଯିବାକୁ ରାସ୍ତା ନାହିଁ….

କଟକ, ନିରପେକ୍ଷ ଖବର:ତା ୧୫/୦୮/୨୦୨୦ ଏମିତି ଏକ ଗାଁ ଅଛି ଯେଉଁ ଗାଁ କୁ ଯିବାକୁ ରାସ୍ତାଟିଏ ନାହିଁ। ନାଉଗାଁ ବ୍ଲକ୍ ର ବ୍ରାହ୍ମଣୀ ଗାଁ ଯେଉଁ ଗାଁ କୁ ଯିବାକୁ ରାସ୍ତାଟିଏ ନାହିଁ। ଏହି ଗାଁର ଲୋକେ ବର୍ଷାଦିନେ ଗାଁ ଭିତରେ ବନ୍ଦୀ ହୋଇ ରହୁଛନ୍ତି।ନେତା,ମନ୍ତ୍ରୀ, ପ୍ରଶାସନ କେହି ବି ଏହି ଗ୍ରାମ ବାସୀଙ୍କ ଦୁଃଖ ବୁଝୁ ନାହାନ୍ତି।ଉଭୟ ରାଜ୍ୟ ଓ କେନ୍ଦ୍ର ସରକାର ଗ୍ରାମାଞ୍ଚଳର ବିକାଶ ହୋଇଥିବା ନେଇ ଡିଣ୍ଡିମ୍ ପିଟୁଥିବା ବେଳେ ସରକାରଙ୍କ ଦୁର୍ବଳତା ର ବାସ୍ତବ ଚିତ୍ର ଦେଖିବାକୁ ମିଳିଛି ଅନେକ ଗ୍ରାମରେ। ଯୋଜନା ପରେ ଯୋଜନା ଯେତେ କରିଲେ ବି ଏହା ଅନେକ ସ୍ଥାନ ରେ ଫଳପ୍ରଦ ହୋଇ ପାରୁନାହିଁ। ଯାହାର ଜ୍ଵଳନ୍ତ ଉଦାହରଣ ଜଗତସିଂହପୁର ଜିଲ୍ଲା ନାଉଗାଁ ବ୍ଲକ ର ବ୍ରାହ୍ମଣୀ ଗାଁ ଗ୍ରାମ ରେ ଦେଖିବାକୁ ମିଳିଛି।ଏହି ଗ୍ରାମରେ ୩୦ ରୁ ଉର୍ଦ୍ଧ୍ୱ ପରିବାର ରହୁଥିବା ବେଳେ ଲୋକ ସଂଖ୍ୟା ୨୦୦ ରୁ ଉର୍ଦ୍ଧ୍ୱ।ଏହି ଗ୍ରାମ ଦେବି ନଦୀ ବନ୍ଧ ସ୍ଥିତ ସାତ କାଳିଆ ଗ୍ରାମ ଠାରୁ ୧ କିଲୋମିଟର ଦୂରରେ ଅବସ୍ଥିତ। ଗାଁ କୁ ଯିବାକୁ ହେଲେ ପାଦ ଚଲା ରାସ୍ତା ହିଁ ଏକମାତ୍ର ଭରଷା।ଏହି ଗ୍ରାମ ର ଗ୍ରାମବାସୀ ଅନ୍ୟ ଗ୍ରାମର ଲୋକଙ୍କ ର ଘରୋଇ ଜମିର ହିଡ଼ ଦେଇକି ଯିବା ଆସିବା କରନ୍ତି। ଏଥିପାଇଁ ମଧ୍ୟ ବେଳେ ବେଳେ ଘରୋଇ ଜମିର ମାଲିକ ଗ୍ରାମର ଲୋକ ଙ୍କ ସହିତ ପାଟି ତୁଣ୍ଡ,ଝଗଡା କରନ୍ତି,ଏମାନେ ଉପାୟ ଶୂନ୍ୟ ହୋଇ ଗ୍ରାମରେ ବନ୍ଦୀ ହୋଇ କି ରୁହନ୍ତି।ପିଲା ମାନଙ୍କର ବର୍ଷା ଦିନେ ସ୍କୁଲ୍ ଓ କଲେଜ୍ ଯିବା ପୁରା ସ୍ବପ୍ନ ପାଲଟି ଯାଏ।ରୋଗୀ ଟିଏ ମେଡିକାଲ୍ ଯିବା ପାଇଁ ହେଲେ ତାକୁ କାନ୍ଧରେ ପକାଇକି ୧ କିଲୋମିଟର ଦୂର ରେ ଥିବା ମୁଖ୍ୟ ରାସ୍ତା କୁ ନେଇକି ଯାଆନ୍ତି। ଏହି ଗାଁ ଟି ଅଞ୍ଚଳର ଶେଷ ଭାଗରେ ରହି ଥିବା ବେଳେ ଆଜି ପର୍ଯ୍ୟନ୍ତ ରାସ୍ତା ଟିଏ ହୋଇ ପାରିଲା ନାହିଁ।ଯେପରିକି କାହାର ଦେହ ଖରାପ ହେଉ କିମ୍ବା ଗର୍ଭବତୀ ମହିଳା ମାନଙ୍କୁ ମେଡିକାଲ୍ ନେବାକୁ ହେଲେ କାନ୍ଧ ଓ ଖଟିଆ ର ଆଶ୍ରା ନେବାକୁ ପଡ଼ିଥାଏ ବୋଲି ବ୍ରାହ୍ମଣୀ ଗାଁ ର ଗ୍ରାମ ବାସୀ ଅଭିଯୋଗ କରିଛନ୍ତି। ଏହି ସମସ୍ୟା ର ସମାଧାନ ନିମନ୍ତେ ଗ୍ରାମବାସୀ ବାରମ୍ବାର ଅଭିଯୋଗ କରିଲେ ମଧ୍ୟ କେହି କର୍ଣ୍ଣପାତ କରୁ ନଥିବା ଅଭିଯୋଗ କରିଛନ୍ତି ନାଉଗାଁ ବ୍ଲକ ବ୍ରାହ୍ମଣୀ ଗାଁ ଗ୍ରାମର ଶୁଭ୍ରାଂଶୁ ବେହୁରା,ବାବୁ ଲେଙ୍କା,ଭରତ ଲେଙ୍କା,ଲକ୍ଷ୍ମୀଧର ରାଉତ,ସନ୍ତୋଷ ଲେଙ୍କା,ବ୍ରଜମୋହନ ମହାପାତ୍ର,ସମୀର ଲେଙ୍କା,ବିଦ୍ୟାଧର ଲେଙ୍କା,ବିପନ୍ନ ଲେଙ୍କା ପ୍ରମୁଖ ଗ୍ରାମବାସୀ।ଯଥାଶୀଘ୍ର ଘରୋଇ ଜମି କୁ କିଣି ଏହି ଗ୍ରାମକୁ ରାସ୍ତା ସଂଯୋଗ କରାନ୍ତୁ ବୋଲି ଗ୍ରାମବାସୀ ସରକାର ଙ୍କୁ ଅନୁରୋଧ କରିଛନ୍ତି। ଯଦି ଖୁବଶିଘ୍ର ଗ୍ରାମର ସମସ୍ୟା ସମାଧାନ ନ ହୁଏ ତେବେ ଏହି ଗ୍ରାମର ଗ୍ରାମବାସୀ ନିଶ୍ଚିତ ଭୋଟ ବର୍ଜନ କରିବା ସହିତ ଆଗାମୀ ଦିନରେ ଅଫିସ୍ ଘେରାଉ କରିବେ ବୋଲି ଚେତାବନୀ ଦେଇଛନ୍ତି। ତେବେ ଏ ଦିଗରେ ସରକାର କିମ୍ବା ପ୍ରଶାସନର ଦୃଷ୍ଟି କେବେ ପଡ଼ିବ ତାହା ଦେଖିବା ବାକି ରହିଲା।