*ନିଜେ ରକ୍ତ ଦେଇ କମଳାକାନ୍ତଙ୍କ ଅପରେସନ ପାଇଁ ସହାୟତା ଯୋଗାଇ ଦେବାକୁ ନିବେଦନ କଲେ…
ଭଦ୍ରକ,ନିରପେକ୍ଷ ଖବର:ତା ୨୧/୧୨/୨୦୨୦ ଗତ ଶୁକ୍ରବାର ରାତି ପ୍ରାୟ ସାଢ଼େ 10 ସମୟ। ହଠାତ ଏକ ମାଲବାଇ ଟ୍ରେନ ମାଡି ଆସିଲା। ଟ୍ରେନ ଲାଇନରେ ସୋଇଥିବା କମଳାକାନ୍ତ ଜେନାଙ୍କ ହାତରେ ଚଢି ଗଲା। ଦେଖୁ ଦେଖୁ ମହାଦେବସାହିର ବାଇଧର ଜେନାଙ୍କ ଏକମାତ୍ର 28 ବର୍ଷୀୟ ପୁଅ କମଳାକାନ୍ତଙ୍କର ଡାହାଣ ହାତ ପୁରା କଟି ଗଲା।
ରକ୍ତ ଜୁଡୁବୁଡୁ ଅବସ୍ଥାରେ ହରିପୁର ପାଖରେ କମଳାକାନ୍ତ ଛିଡା ହୋଇଥିବା ଖବର ପହଞ୍ଚିଥିଲା ନିରଞ୍ଜନଙ୍କ ପାଖରେ। ଏ ଖବର ଶୁଣିବା ମାତ୍ରେ ସେ ତୁରନ୍ତ ସହାୟତା ଯୋଗାଇବାକୁ ଦୌଡ଼ି ଯାଇଥିଲେ। ପରିବାର ଲୋକ ପହଞ୍ଚିବା ପୂର୍ବରୁ ନିରଂଜନ ଦୁର୍ଘଟଣା ସ୍ଥଳକୁ ଯାଇ କମାଳକାନ୍ତଙ୍କୁ ତିହିଡି ମେଡିକାଲରେ ପହଞ୍ଚାଇ ଥିଲେ। ସେଠାରୁ ପୁଣି ଭଦ୍ରକ ମେଡିକାଲ ତାପରେ କଟକ ବଡ଼ମେଡିକାଲକୁ ନେଇ ଯାଇଥିଲେ। ଖାଲି ଏତିକି ନୁହେଁ ଜୀବନରେ କେବେ ବି ରକ୍ତ ଦେଇ ନଥିବା ନିରଞ୍ଜନ ପ୍ରଥମ ଥର ପାଇଁ ରକ୍ତଦାନ କରିବାକୁ ଆଗେଇ ଆସିଥିଲେ। ମନର କେବଳ ଗୋଟେ କଥା ଉଙ୍କି ମାରୁ ଥିଲା ଯେ କେମିତି କମଳାକାନ୍ତ ଆରୋଗ୍ୟ ହେବେ। କମଳାକାନ୍ତ ଏବେ କଟକ ବଡ଼ମେଡିକାଲରେ ଚିକିତ୍ସିତ ହେଉଛନ୍ତି। ହେଲେ ତାଙ୍କ ବାପା ବାଇଧର ଜେନା ଜଣେ ଖଟିଖିଆ ଗରିବ ଶ୍ରେଣୀର ଲୋକ ହୋଇଥିବାରୁ ପୁଅର କଟା ହାତ ଅପରେସନ କରିବାରେ ଅସମର୍ଥ ହେଉଛନ୍ତି। ଏଭଳି ସମୟରେ ଯଦି ଆମେ କିଛି କିଛି ତାଙ୍କୁ ଆର୍ଥିକ ସାହାଯ୍ୟ ଯୋଗାଇ ପାରନ୍ତେ କମଳାକାନ୍ତ ସୁସ୍ଥ ହୋଇ ପୁଣି ଥରେ ବାପାଙ୍କର ସ୍ୱପ୍ନ ପୂରଣ କରିପାରନ୍ତା।
ଆସନ୍ତୁ ଜାଣିବା ୱାର୍ଡ ମେମ୍ବର ନିରଞ୍ଜନଙ୍କ ମହାନତା ବିଷୟରେ….
ସ୍ଥାନୀୟ ଅଞ୍ଚଳରେ ଜଣେ କର୍ମବୀର ଯୁବକ ଭାବେ ନିରଞ୍ଜନଙ୍କୁ ସମସ୍ତେ ଜାଣନ୍ତି। ପରିବାରର ଆର୍ଥିକ ଅବସ୍ଥା ଶୋଚନୀୟ ଥିବାରୁ ସେ ଉଚ୍ଚଶିକ୍ଷିତ ହୋଇପାରି ନଥିଲେ। ପରିବାର ଚଳାଇବା ପାଇଁ ପିଲାଟି ଦିନରୁ ବାପାଙ୍କ କୁଳ ବ୍ୟବସାୟ ଚାଷ କାର୍ଯ୍ୟ ସାଙ୍ଗକୁ ରିକ୍ସା ଚଲାଇବାକୁ ଆଗେଇ ଆସିଥିଲେ। ଗ୍ରାମର ପାଖପଡ଼ୋଶୀଙ୍କ ଜମିରେ କାମ କରି ପରିବାର ମୁହଁରେ ଦାନା ଦେବା ସହ ଧୀରେ ଧୀରେ ସେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କଲେ। ଗ୍ରାମବାସୀଙ୍କ ସୁଖ ଦୁଃଖରେ ସାଥି ହେଲେ। ସେଥିପାଇଁ ୨୦୧୭ ମସିହା ପଞ୍ଚାୟତ ନିର୍ବାଚନରେ ଗ୍ରାମବାସୀମାନେ ତାଙ୍କୁ ୱାର୍ଡମେମ୍ବର ଭାବେ ବାଛି ଗାଁର ମୁଖିଆ କଲେ। ସେ ମଧ୍ୟ ଦଳଗତ ନିର୍ବିଶେଷରେ ସମସ୍ତଙ୍କ ଭଲମନ୍ଦରେ କାନ୍ଧକୁ କାନ୍ଧ ମିଶାଇ ହୃଦୟ ଜିଣିଛନ୍ତି। ନିରଞ୍ଜନ ହେଉଛନ୍ତି ବାବାଜୀ ମହାଳିକଙ୍କ ବଡ଼ପୁଅ। ନିରଞ୍ଜନଙ୍କର ଏମିତି ନିଃସ୍ୱାର୍ଥପର ସେବା ପାଇଁ ସମସ୍ତେ କୃତଜ୍ଞତା ଜ୍ଞାପନ କରିଛନ୍ତି।
