ଭୁବନେଶ୍ୱର,ନିରପେକ୍ଷ ଖବର:ତା ୨୩/0୨ ଓଡ଼ିଶା ରାଜ୍ୟ ଅଭିଲେଖାଗାରରେ ୬୬ତମ ସଂସ୍କୃତି ଚର୍ଚ୍ଚା ସମ୍ପାନ ମହୋତ୍ସବ ଅନୁଷ୍ଠିତ ହୋଇ ଯାଇଅଛି । ଉକ୍ତ ଉତ୍ସବରେ ମୁଖ୍ୟ ବକ୍ତା ଭାବରେ ଯୋଗଦାନ କରିଥିଲେ ପ୍ରଫେସର କୁମାରବର ଦାସ,ପୂର୍ବତନ କୂଳପତି ଫକୀର ମୋହନ ବିଶ୍ବବିଦ୍ୟାଳୟ, ବାଲେଶ୍ଵର । ମୁଖ୍ୟ ଅତିଥ୍ ଭାବରେ ବିଭାଗୀୟ ନିର୍ଦ୍ଦେଶକ ତଥା ସ୍ଵତନ୍ତ୍ର ଶାସନ ସଚିବ ଶ୍ରୀଯୁକ୍ତ ରଞ୍ଜନ କୁମାର ଦାସ ଯୋଗଦାନ କରିଥିଲେ ଏବଂ ସଭାପତିତ୍ବ କରିଥିଲେ ବିଭାଗୀୟ ଅତିରିକ୍ତ ଶାସନ
ସଚିବ ଶ୍ରୀଯୁକ୍ତ ମଧୁସୂଦନ ଦାଶ । ସମ୍ପାନରେ ସ୍ଵାଗତ ଭାଷଣ ଦେଇଥିଲେ ଓଡ଼ିଶା ରାଜ୍ୟ ଅଭିଲେଖାଗାରର ଅଧୀକ୍ଷକ ଡ. ଶେଖ୍ ସୋଲେମାନ ଅଲ୍ଲୀ ଏବଂ ଧନ୍ୟବାଦ ଅର୍ପଣ କରିଥିଲେ ଶ୍ରୀଯୁକ୍ତ ଉପେନ୍ଦ୍ର କୁମାର ବେହେରା ।
ଏହି ଅବସରରେ ମୁଖ୍ୟ ବକ୍ତା ପ୍ରଫେସର କୁମାରବର ଦାସ କହିଥିଲେଯେ ସଂସ୍କାର ବିନା ସଂସ୍କୃତି ଅସିମୀଚିନ ।
ଇଂରାଜୀ ପାଠ ପଢ଼ିବା, ଇଂରାଜୀ ସାମ୍ରାଜ୍ୟବାଦର ଅହମିକା ବିଦେଶୀ ମାନସିକତା ଭରି ଦେଉଛି । ବୈଷମ୍ୟ ଅର୍ଥନୈତିକ ଓ ସାମାଜିକ ସମସ୍ୟା ଏବେ ଏହା ଅମାନବିକ ବ୍ୟାଧୁରେ ପରିଣତ ହୋଇଛି । ଯୁବ ସମାଜ ଆଜି ପଥ ଭ୍ରଷ୍ଠ । ମଣିଷର ସବୁ ବୁଦ୍ଧି ବିଦ୍ୟା ଓ ବୈଜ୍ଞାନିକ ଅଗ୍ରଗତି ସାରା ବିଶ୍ଵର ମୃତ୍ୟୁ ଘଣ୍ଟି ବଜାଇଲାଣି । ମାନବିକତା ସଂଯୁକ୍ତ ଜାତୀୟତାବୋଧ ଯୁଦ୍ଧ ପ୍ରବଣତା ବୃଦ୍ଧିକରିବା ପରିବର୍ତ୍ତେ ହ୍ରାସ ହେବା ଉଚିତ । ସାରା ପୃଥିବୀର ନବ୍ୟ ମାନବିକ ମୂଲ୍ୟବୋଧର ନେତୃତ୍ଵ ଭାରତ ନେବାକୁ ପ୍ରସ୍ତୁତ ହେବା ଉଚିତ । ଦୁର୍ନିତୀ ପ୍ରବଣତା ଆମ ଦେଶକୁ ପଛୁଆ କରି ରଖୁଛି । ସଂସ୍କୃତି ବିନା ସଭ୍ୟତା ନାହିଁ । ପ୍ରଫେସର ଦାସ ଉଦାହରଣ ଦେଇ କହିଥିଲେ ରାବଣ ଥିଲା ସଭ୍ୟତାର ପ୍ରତୀକ, ରାମ ଥିଲେ ସଂସ୍କୃତିର ପ୍ରତୀକ । ସଫଳତା ହେଉଛି ସ୍ଵାର୍ଥ କେନ୍ଦ୍ରିକ, ସାର୍ଥକତା ହେଉଛି ବିଶ୍ଵ କେନ୍ଦ୍ରିକ । ଅନ୍ଧ ବିଶ୍ଵାସ ହେଉଛି ଅପ ସଂସ୍କୃତି । ସମ୍ପାନର ମୁଖ୍ୟ ଅତିଥି, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ନିର୍ଦ୍ଦେଶକ ତଥା ସ୍ଵତନ୍ତ୍ର ଶାସନ ସଚିବ, ଶ୍ରୀଯୁକ୍ତ ରଞ୍ଜନ କୁମାର ଦାସ ମହୋଦୟ କହିଥିଲେ ସମାଜ ନିଜସ୍ଵ ପରିଚୟ ସୃଷ୍ଟିକରେ ନିଜର ସଂସ୍କୃତି ମାଧ୍ୟମରେ । ଏହି ଭିତରେ ନିଜର ଜାତୀୟ ଚରିତ୍ର ସୃଷ୍ଟି ହୋଇଥାଏ । ଆମେ ଆମକୁ ବିଶ୍ଵଗୁରୁ ଭାବରେ ପ୍ରତିପାଦିତ କରିବାକୁ ହେଲେ ନିଜର ଚରିତ୍ର ମଧ୍ୟ ବଦଳାଇବାକୁ ପଡ଼ିବ । ସମ୍ପାନର ସମ୍ମାନନୀୟ ଅତିଥୁ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ଅତିରିକ୍ତ ଶାସନ ସଚିବ ଶ୍ରୀଯୁକ୍ତ ମଧୁସୂଦନ ଦାଶ ମହୋଦୟ କହିଥିଲେ ଯେ ସମାଜ ଓ ସଂସ୍କୃତି ପରଷ୍ପର ଜଡ଼ିତ । ସମାଜ, ସଂସ୍କୃତି ଓ ଜାତୀୟ ଚେତନା ଜାଗୃତି ହେଲେ ଦେଶ ଉନ୍ନତି ପଥରେ ଅଗ୍ରସର ହେବ । ପରିଶେଷରେ ଦର୍ଶକ ଏବଂ ବୁଦ୍ଧିଜିବୀ ମାନଙ୍କର ମୁକ୍ତ ଆଲୋଚନା ହୋଇଥିଲା ଯେଉଁଥିରେ ଉପସ୍ଥିତ ଶ୍ରୋତାମଣ୍ଡଳୀ ମୁଖ୍ୟ ବକ୍ତାଙ୍କୁ ବିଭିନ୍ନ ପ୍ରଶ୍ନ ପଚାରିଥିଲେ ଏବଂ ତାହାର ଉତ୍ତର ପାଇଥିଲେ ।
