ଭୁବନେଶ୍ୱର: ନିରପେକ୍ଷ ଖବର:୨୦ ମେ ୨୦୧୯- ୨୦୧୯ ମଇ ମାସ ୩ ତାରିଖ ଦିନ ସାମୁଦ୍ରିକ ଝଡ ଫନୀ / ଫଣି ରୂପରେ ପ୍ରକୃତିର କରାଳ ରୂପକୁ ପ୍ରତ୍ୟକ୍ଷ କରିଥିଲା ଆମ ରାଜ୍ୟ ଓଡ଼ିଶା । ସମୁଦାୟ ୧୪ ଗୋଟି ପ୍ରଭାବିତ ଜିଲ୍ଲା ମଧ୍ୟରୁ ସବୁଠାରୁ ବ୍ୟାପକ ଭାବରେ ପ୍ରଭାବିତ ହୋଇଥିଲା ରାଜ୍ୟର ରାଜଧାନୀ ଭୁବନେଶ୍ୱର ତଥା ପୁରୀ ଓ ଖୋର୍ଦ୍ଧା ଜିଲ୍ଳା । ଏହି ଅଂଚଳରେ କାର୍ଯ୍ୟରତ ବ୍ୟାଙ୍କଗୁଡିକ ସ୍ଥାଣୁ ପ୍ରାୟ । ନଗଦ ଟଙ୍କାର ପ୍ରବଳ ଆବଶ୍ୟକତା ବେଳେ ବିଦ୍ୟୁତ ତଥା ଇଂଟରନେଟ୍ ଲିଙ୍କ୍ ବିନା ସମଗ୍ର Digital/ Cash Payment System କାର୍ଯ୍ୟକରିବା ପ୍ରାୟ ବନ୍ଦ କରିଦେଇଛି । ଧ୍ୱଂସ ବିଧ୍ୱଂସ୍ତ ସ୍ତୁପ ମଧ୍ୟରୁ ପ୍ରଚଣ୍ଡ ଖରା, ଭୋକ ତଥା ଶୋଷକୁ ଭୁଲି ସ୍ୱପ୍ନକୁ ସାଉଁଟୁ ଥିବା ଅସହାୟମାନଙ୍କ କିଂଚିତ ସେବା କରିବାର ସାମାନ୍ୟ ସୁଯୋଗକୁ ହାତଛଡା କରିନାହିଁ ସମବାୟ ବ୍ୟବସ୍ଥା । ଏକଦା ରାଜ୍ୟର ୧୧ ଗୋଟି କେନ୍ଦ୍ର ସମବାୟ ବ୍ୟାଙ୍କର କାର୍ଯ୍ୟ ପରିସରରେ ଆଦିବାସୀ ତଥା ଅପାନ୍ତ ଅଂଚଳରେ ସେବା ଯୋଗାଇବା ପାଇଁ ରାଜ୍ୟ ସରକାରଙ୍କ ପ୍ରଚ୍ଛନ୍ନ ସହାୟତାରେ ତଥା ରାଜ୍ୟ ସମବାୟ ବ୍ୟାଙ୍କର ପ୍ରତ୍ୟକ୍ଷ ତତ୍ୱାବଧାନରେ ଆରମ୍ଭ ହୋଇଥିଲା Banking on wheel କାର୍ଯ୍ୟକ୍ରମ । ଏଥିରୁ ୨୦ ଗୋଟି ଭ୍ରାମ୍ୟମାଣ ଏ.ଟି.ଏମ୍. ଉପରୋକ୍ତ ୧୧ ଗୋଟି ବ୍ୟାଙ୍କର ୧୫ ଗୋଟି ଜିଲ୍ଲାର ଦ୍ୱାରଦେଶରେ ସେବା ଯୋଗାଇବା ପାଇଁ ନିୟୋଜିତ ହୋଇ କାର୍ଯ୍ୟ କରିଆସୁଛନ୍ତି । ଏପରି ବିପଦପୂର୍ଣ୍ଣ ସମୟରେ ରାଜ୍ୟର ଉନ୍ନତ ଅଂଚଳରେ ବାସ କରୁଥିବା ଲୋକଙ୍କ ସେବାରେ ଆସିଛି ସେହି ମୋବାଇଲ ଏ.ଟି.ଏମ୍. ଲୋକଙ୍କ ହାତ ପାହାନ୍ତାରେ ନଗଦ ଟଙ୍କା ଯୋଗାଇବାରେ ରାଜ୍ୟ ସରକାରଙ୍କର ସମବାୟ ବିଭାଗର ଶାସନ ସଚିବ ଡଃ. କ୍ରିଷନ୍ କୁମାରଙ୍କ ନିର୍ଦ୍ଦେଶ ଅନୁଯାୟୀ ଓଡ଼ିଶା ରାଜ୍ୟ ସମବାୟ ବ୍ୟାଙ୍କ ଅଧିକାରୀଙ୍କ ତତ୍ୱାବଧାନରେ ୧୦ ତାରିଖଠାରୁ କୋରାପୁଟ କେନ୍ଦ୍ର ସମବାୟର ୩ଟି, କେନ୍ଦୁଝର , ଅନୁଗୁଳ, ତଥା ବୌଦ୍ଧ କେନ୍ଦ୍ର ସମବାୟ ବ୍ୟାଙ୍କର ୨ ଗୋଟି ଲେଖାଏଁ ତଥା ଭବାନୀପାଟଣା, ମୟୁରଭଞ, ବ୍ରହ୍ମପୁର ଏବଂ ସମ୍ବଲପୁର ସମବାୟ ବ୍ୟାଙ୍କ ଗୁଡିକର ଗୋଟିଏ ଲେଖାଏଁ ଏପରି ସମୁଦାୟ ୧୩ ଗୋଟି ଭ୍ରାମ୍ୟମାଣ ଏ.ଟି.ଏମ୍ ସେବା ପ୍ରଦାନକାରୀ ବସ୍ ପୁରୀ ଜିଲ୍ଲାପାଳଙ୍କ ଆଦେଶ ଅନୁଯାୟୀ ପୁରୀ ସହର ତଥା ଏହି ଜିଲ୍ଲାର ବିଭିନ୍ନ ଅଂଚଳ, ନିମାପଡା, ଗୋପ ତଥା କୋଣାର୍କ, ପିପିଲି ଓ ସତ୍ୟବାଦୀ ବ୍ଲକରେ ନିୟମିତ ରୂପେ ସେବା ପ୍ରଦାନ କରି ଆସୁଅଛି । ପୁରୀ ଜିଲ୍ଲାର ଜନ ସାଧାରଣଙ୍କ ଏହି ଅସମୟରେ ଲୋକଙ୍କର ଆହୁରି ନିକଟତର ହୋଇପାରିଛି ସମବାୟ ବ୍ୟାଙ୍କ ବ୍ୟବସ୍ଥା ।ରାଜ୍ୟ ସମବାୟ ବ୍ୟାଙ୍କର ଅଧିକାରୀ ତଥା କର୍ମଚାରୀ, ଉପରୋକ୍ତ ୮ ଗୋଟି କେନ୍ଦ୍ର ସମବାୟ ବ୍ୟାଙ୍କର ଅଧିକାରୀ ତଥା ନିୟୋଜିତ କର୍ମଚାରୀଙ୍କ ଅକ୍ଳାନ୍ତ ପରିଶ୍ରମ ଓ ନିରନ୍ତର ପ୍ରୟାସ ଦ୍ୱାରା ଲୋକଙ୍କ ଦ୍ୱାରରେ ନଗଦ ଟଙ୍କା ଯୋଗାଣ କରି ସେମାନଙ୍କ ଦୁଃଖ ଲାଘବ କରିବାରେ ସହାୟକ ହୋଇପାରିଛନ୍ତି । ଏହି ସମସ୍ତ ଭ୍ରାମ୍ୟମାଣ ଏ.ଟି.ଏମ୍ ଭ୍ୟାନ ଗୁଡିକୁ ନଗଦରାଶି ଯୋଗାଣକାରୀ ପୁରୀ ନିମାପଡା ସଂଯୁକ୍ତ କେନ୍ଦ୍ର ସମବାୟ ବ୍ୟାଙ୍କ ନିଜେ ପ୍ରଭାବିତ ହୋଇ ମଧ୍ୟ ଏହି ଦୁର୍ଦ୍ଦିନରେ ଲୋକଙ୍କ ସେବା କରିବାରେ ଏକ ବିଶେଷ ଭୂମିକା ଗ୍ରହଣ କରିଅଛି । ଓଡ଼ିଶା ରାଜ୍ୟ ସମବାୟ ବ୍ୟାଙ୍କର ସାଧାରଣ ପରିଚାଳକ ଶ୍ରୀ ଚୌଧୁରୀ ବିନୀତ କୁମାର ଦାଶ ଓ ପୁରୀ ନିମାପଡ଼ା ସଂଯୁକ୍ତ କେନ୍ଦ୍ର ସମବାୟ ବ୍ୟାଙ୍କର ସମ୍ପାଦକ ଶ୍ରୀ ବିଧୁଭୂଷଣ ଦାସ ଏହି ଏ.ଟି.ଏମ୍ ଭ୍ୟାନ ଗୁଡ଼ିକ ମଧ୍ୟରେ ସମନ୍ୱୟ ରକ୍ଷା କରିବା ଓ ନିୟୋଜିତ କର୍ମଚାରୀଙ୍କର ତତ୍ୱାବଧାନ କରି ଏହି କାର୍ଯ୍ୟକ୍ରମକୁ ସଫଳ କରିଛନ୍ତି । ଜନସାଧାରଣ ଓ ପୁରୀକୁ ଆସିଥିବା ପର୍ଯ୍ୟଟକମାନେ ଭ୍ରାମ୍ୟମାଣ ଏ.ଟି.ଏମ୍. ର ସମବାୟ ବ୍ୟାଙ୍କ ସେବାକୁ  ପ୍ରଶଂସା କରୁଛନ୍ତି । ଜିଲ୍ଲା ପ୍ରଶାସନ ମଧ୍ୟ ଏହି ଏ.ଟି.ଏମ୍. ଭ୍ୟାନ ଗୁଡ଼ିକର ନିୟୋଜନ ଓ ନିରାପତା ପାଇଁ ଆବଶ୍ୟକୀୟ  ସୁବିଧା ସୁଯୋଗ ଯୋଗାଇ ଦେଇଛନ୍ତି ।