ଚାନ୍ଦା ନ ଦେବାରୁ ବରିଷ୍ଠ ନାଗରିକଙ୍କୁ ମରଣାନ୍ତକ ଆକ୍ରମଣ ଘଟଣା ….

ଭୁବନେଶ୍ୱର,(ନିରପେକ୍ଷ ଖବର) ୧୨/୯: ଗଣେଶ ପୂଜା ଚାନ୍ଦାକୁ କେନ୍ଦ୍ର କରି ଅଶୋକନଗରର ବରିଷ୍ଠ ନାଗରିକ ତଥା  ଲଜ୍ ମାଲିକ ଚିନ୍ତାମଣି ନାୟକଙ୍କ ଉପରେ ହୋଇଥିବା ମରଣାନ୍ତକ ଆକ୍ରମଣ ଘଟଣାକୁ ବିତିଗଲାଣି ୫ ଦିନ। ହେଲେ ମୁଖ୍ୟ ଅଭିଯୁକ୍ତକୁ ଧରିବା ପାଇଁ ଏ ପର୍ଯ୍ୟନ୍ତ କ୍ୟାପିଟାଲ ଥାନା ପୁଲିସ ଉଦ୍ୟମ କରୁନଥିବା ଦେଖିବାକୁ ମିଳିଛି। ଦୋଷୀକୁ ଗିରଫ କରିବା ପ୍ରତିବଦଳରେ ଅଭିଯୁକ୍ତମାନଙ୍କୁ ପୁଲିସ ସୁରକ୍ଷା ଦେଉଥିବା ଅଭିଯୋଗ ହୋଇଛି। ସୂଚନା ମୁତାବକ କ୍ୟାପିଟାଲ ଥାନା ଅନ୍ତର୍ଗତ ଅଶୋକ ନଗରର  ଲଜ ମାଲିକଙ୍କୁ ଗଣେଶ ପୂଜ ଚାନ୍ଦା ମାଗିବାକୁ ଆସି ୧୫ରୁ ଅଧିକ  ଯୁବକ ଚିନ୍ତାମଣି ନାୟକଙ୍କୁ ଆକ୍ରମଣ କରିଥିଲେ। ଯାହାକୁ ନେଇ କ୍ୟାପିଟାଲ ଥାନାରେ ଏକ ଏତଲା ଦିଆଯାଇଥିଲା। ମାତ୍ର ପୁଲିସ୍ କେବଳ ୨ ବା ୩ ଜଣ ସହଯୋଗୀଙ୍କୁ ଗିରଫ କରି ଚୁପ୍ ବସିଛି । ଫଳରେ ମୁଖ୍ୟ ଅଭିଯୁକ୍ତ ଖୁଲମ୍ ଖୁଲା ବୁଲିବା ସହ ଚିନ୍ତାମଣି ଓ ପରିବାର ଲୋକଙ୍କୁ ଧମକ ଦେଉଛନ୍ତି। ତେବେ ମୁଖ୍ୟ ଅଭିଯୁକ୍ତଙ୍କ ନାମରେ ପୂର୍ବରୁ ଶହୀଦନଗର ଓ କ୍ୟାପିଟାଲ ଥାନାରେ ମାମଲା ରହିଛି। ସେ ଚିନ୍ତାମଣି ନାୟକଙ୍କୁ ଧମକ ଦେଉଥିବାରୁ ତାଙ୍କ ଜୀବନ ପ୍ରତି ବିପଦ ରହିଥିବା ଚିନ୍ତାମଣି ଗଣମାଧ୍ୟମକୁ କହିଛନ୍ତି। ଅଭିଯୋଗ ଅନୁସାରେ, ଗଣେଶ ପୂଜା ପାଇଁ ଗତ ୪ ତାରିଖରେ ଚିନ୍ତାମଣିଙ୍କୁ ୧୦ ହଜାର ଚାନ୍ଦା ମଗାଯାଇଥିଲା। ମାତ୍ର ସେ ୧୨ଶହ ଟଙ୍କା ଦେଇଥିଲେ। ଏହି ରାଗରେ ସମ୍ପୃକ୍ତଯୁବକମାନେ ଗତ ୬ ତାରିଖ ରାତି ୧୦ଟାରେ ଚିନ୍ତାମଣିଙ୍କ ଘର କବାଟ ବାଡେଇଥିଲେ । ସେ ବାହାରକୁ ଆସିବା ପରେ ପରିବାର ଲୋକଙ୍କ ସମ୍ମୁଖରେ ତାଙ୍କୁ ମରଣାନ୍ତକ ଆକ୍ରମଣ କରି ଫେରାର ହୋଇଯାଇଥିଲେ। ଗୁରୁତର ଅବସ୍ଥାରେ ତାଙ୍କୁ ପ୍ରଥମେ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଥିଲା । ତେବେ ମୁଖ୍ୟ ଅଭିଯୁକ୍ତ ଜଣକ ରାଜନୈତିକ ଚାପ ପକାଉଥିବାରୁ ପୋଲିସ ତାଙ୍କୁ ଗିରଫ କରୁ ନ ଥିବା ଚିନ୍ତାମଣି କହିଛନ୍ତି। ତାଙ୍କ ସହ ପରିବାର ସଦସ୍ୟଙ୍କ ଜୀବନ ପ୍ରତି ବିପଦ ଥିବାରୁ ସୁରକ୍ଷା ଓ ନ୍ୟାୟ ପାଇଁ ନିବେଦନ କରିଛନ୍ତି ଚିନ୍ତାମଣି। ଏ ସମ୍ପର୍କରେ ପୋଲିସ କମିଶନର ସୁଧାଶୁ ଷଡ଼ଙ୍ଗୀଙ୍କୁ ପଚାରିବାରୁ ସେ ଘଟଣା ସମ୍ପର୍କରେ ଅବଗତ ନ ଥିବା କହିଥିଲେ। ଏନେଇ ଅଭିଯୋଗକାରୀ ସିଧାସଳଖ ତାଙ୍କ ସହ ଯୋଗାଯୋଗ କରିବାକୁ ସେ କହିଛନ୍ତି। ଏହି ଘଟଣାକୁ ତଦନ୍ତ କରାଯାଇ ପୋଲିସ ପକ୍ଷରୁ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହିତ ଅଭିଯୋଗକାରୀଙ୍କୁ ସମସ୍ତ ପ୍ରକାର ସୁରକ୍ଷା ଯୋଗାଇଦଦିଆଯିବ ବୋଲି କମିଶନର ଶ୍ରୀ ଷଡଙ୍ଗୀ କହିଛନ୍ତି।