ଯୋଗଦେଲେ ବଲିଉଡ଼ ଅଭିନେତ୍ରୀ ଦିଆ ମିର୍ଜା
ଷ୍ଟେଜରେ ଜଲୱା ଦେଖାଇଲେ ଆଦିବାସୀ ମଡ଼େଲର
ଭୁବନେଶ୍ୱର,ନିରପେକ୍ଷ ଖବର:ତା ୧୧/୦୧ ଇଣ୍ଡିଆନ ଚାମ୍ବର ଅଫ୍ କମର୍ସ ଏବଂ ମହିଳା ଉଦ୍ୟୋଗୀ ପରିଷଦର ମିଳିତ ସହଯୋଗରେ ପଟିଆ ପାଲଟ୍ରୋନିକ୍ସ ଗ୍ରାଉଣ୍ଡ ଠାରେ ଚାଲିଛି ଫ୍ୟାଶନ ଓ ଲାଇଫ୍ ଷ୍ଟାଇଲ ମେଳା । ଆଜି ଥିଲା ମେଳାର ତୃତୀୟ ଦିବସ । ଗତ ଦୁଇ ଦିନ ଧରି ମେଳା ପରିସରରେ ହଜାର ହଜାର ଦର୍ଶକ ବୁଲି ଦେଖିଥିବା ବେଳେ ଆଜି ମଧ୍ୟ ନାହିଁ ନଥିବା ଭିଡ଼ ପରିଲକ୍ଷିତ ହୋଇଥିଲା । ଏଥିରେ ଏସ୍.ଏସ୍.ଜି, ଆଦିବାସୀ ଏବଂ ତୃଣମୂଳରୁ ଆସିଥିବା ଉଦ୍ୟୋଗୀମାନେ ସେମାନଙ୍କ ଉତ୍ପାଦ ପ୍ରଦର୍ଶିତ କରୁଛନ୍ତି । ତୃତୀୟ ଦିବସର ଆଲୋଚନା ଚକ୍ରର ବିଷୟବସ୍ତୁ ଥିଲା କପଡ଼ା ଏବଂ ଡ଼ଜାଇନ୍ର ପୁନର୍ବିନ୍ୟାସ ଏବଂ ମିଶ୍ରଣ । ଏଥିରେ ନୀତିଶା ମନ୍ ଏବଂ ଗାର୍ଗି ଭଟ୍ଟାଚାର୍ଯ୍ୟ ଅଂଶଗ୍ରହଣ କରିଥିବାବେଳେ ବୈଶାଳୀ ନନ୍ଦ ଏହି ପର୍ଯ୍ୟାୟକୁ ପରିଚାଳନା କରିଥିଲେ । ବଲିଉଡ଼୍ ଅଭିନେତ୍ରୀ ଦିଆ ମିର୍ଜା ଏହି ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇଥିଲେ । ଦିଆଙ୍କ ସହ ଆଇ.ଏନ୍.ଡ଼ବ୍ଲୁ.ଇ.ସି. କୋର ସଦସ୍ୟ ମିନୁ ପଟ୍ଟନାୟକ ଇଣ୍ଟରାକ୍ଟିଭ୍ ଅଧିବେଶନ କରିଥିଲେ । ଦିଆ ମିର୍ଜା ଦର୍ଶକଙ୍କ ସହ ତାଙ୍କର ଯାତ୍ରା ଏବଂ ଅନୁଭୂତି ବାଣ୍ଟିଥିଲେ ଓ ହ୍ୟାଣ୍ଡଲୁମ୍କୁ ସମର୍ଥନ କରୁଥିବା ଉଦ୍ୟୋଗୀ ଏବଂ ବ୍ୟବସାୟୀମାନଙ୍କୁ ମଧ୍ୟ ପୁରସ୍କାର ପ୍ରଦାନ କରିଥିଲେ । ଉଦ୍ୟୋଗୀମାନେ ଏହା ଉପରେ ନିଜର ମତ ରଖିଥିଲେ । ଏହି ଅଧିବେଶନରେ ଉତ୍ସାହର ସହିତ ବହୁ ଦର୍ଶକ ଯୋଗ ଦେଇଥିଲେ । ସନ୍ଧ୍ୟାର ବିଶିଷ୍ଟ ଅତିଥି ଭାବେ ଆଇ.ଏ.ଏସ୍. ତଥା ପି.ଆର୍. ଆଣ୍ଡ ଡ଼ିଡବ୍ଳୁର ଅତିରିକ୍ତ ସଚିବ ପୁଣମ୍ ଗୁହା, ଏମ୍.ଏସ୍.ଏମ୍.ଇ.ଡ଼ି.ଏଫ୍.ଓ.ର ଉପ-ନିର୍ଦ୍ଦେଶକ ନୀତିଶା ମନ୍ ଯୋଗଦେଇ ଷ୍ଟଲ ପରିଦର୍ଶନ କରି ସେମାନଙ୍କ ମତାମତ ବାଣ୍ଟିଥିଲେ । ଆଇ.ଏନ.ଡ଼ବ୍ଳୁ.ଇ.ସି.ର ସହ-ଅଧ୍ୟକ୍ଷା ସୁକିର୍ତ୍ତି ପଟ୍ଟନାୟକ ମେଳାକୁ ଲୋକଙ୍କ ଅକୁଣ୍ଠ ସମର୍ଥନ ପାଇଁ ଧନ୍ୟବାଦ ଜଣାଇଥିଲେ ଓ ତତ୍ସହିତ ପ୍ରାଇଡ଼ ଅଫ୍ ଓଡ଼ିଶା ପଦଯାତ୍ରା ମାଧ୍ୟମରେ ହାଣ୍ଡଲୁମ୍କୁ ପ୍ରୋତ୍ସାହନ ଦିଆଯାଉଥିବାରୁ ସଂପୃକ୍ତ ଅତିଥିମାନଙ୍କୁ ଧନ୍ୟବାଦ ଜ୍ଞାପନ କରିଥିଲେ । ଆଇ.ଏନ୍.ଡ଼ବ୍ଳୁ.ଇ.ସି.ର କନଭେନର ତନୟା ପଟ୍ଟନାୟକ ଡ଼ିଜାଇନର ମାନଙ୍କୁ ଧନ୍ୟବାଦ ଦେଇଥିଲେ ଏବଂ ହାଣ୍ଡଲୁମ୍ ବ୍ୟବହାର କରି ଅଭିନବ ଉତ୍ପାଦ ସୃଷ୍ଟି ପାଇଁ ଅତୁଲ୍ୟ କାରିଗରୀ ଉଦ୍ୟଗୀଙ୍କୁ ସମର୍ଥନ ଜଣାଇଥିଲେ । ତୃଣମୂଳ ସ୍ତରରେ ଏହି କାର୍ଯ୍ୟକ୍ରମ ପ୍ରଶଂସାର ପାତ୍ରବୋଲି ସେ ମତ ଦେଇଥିଲେ । ଦିନର ସବୁଠାରୁ ବଡ଼ ଆକର୍ଷଣ ଥିଲା ପ୍ରାଇଡ଼୍ ଅଫ୍ ଓଡ଼ିଶା ଫ୍ୟାଶନ୍ ସୋ । ସବୁଠାରୁ ସଫଳ ଉଦ୍ୟୋଗୀ, ବ୍ୟବସାୟ ନେତା ଏବଂ ଓଡ଼ିଶାର ସଫଳ ବ୍ୟକ୍ତିମାନେ ଡ଼ିଜାଇନର୍ ରାମୁଲିଙ୍କ ଦ୍ୱାରା ପରିକଳ୍ପିତ ହ୍ୟାଣ୍ଡଲୁମ୍ ପୋଷାକ ପରିଧାନକରି ରାମ୍ପରେ ଚାଲିଥିଲେ । ହସ୍ତତନ୍ତ ଏବଂ ହସ୍ତତନ୍ତରେ କାର୍ଯ୍ୟକରୁଥିବା ହଜାର ହଜାର ତୃଣମୂଳ ଉଦ୍ୟୋଗୀଙ୍କୁ ସମର୍ଥନ କରୁଥିବା ଅତୁଲ୍ୟ କାରିଗରୀ ଫ୍ୟାଶନ୍ ସୋ ମାଧ୍ୟମରେ ସେମାନଙ୍କର ହ୍ୟାଣ୍ଡଲୁମ୍ ପୋଷାକ ପ୍ରଦର୍ଶନ କରିଥିଲେ । ଲେବେଲ ଫ୍ୟାଶନିଷ୍ଟାର ଡ଼ିଜାଇନର୍ ତମାସା ମହାପାତ୍ର, ଲେବେଲ ଡ଼ିଟୁଲିପର୍ ତୁଲିକା ମହାନ୍ତି, ଲେବେଲ୍ ଏଜ୍ ଫ୍ୟାଶନର ସେଲିନା ଦାଶନ ସେମାନଙ୍କ ପ୍ରସ୍ତୁତ ପୋଷାକ ପ୍ରଦର୍ଶିତ କରିଥିଲେ । ସେହିପରି ରାଜ୍ୟରୁ ଆସିଥିବା ଆଦିବାସୀ ଭଉଣୀମାନେ ରାମ୍ପରେ ଚାଲିଥିଲେ । ଏହି ଫ୍ୟାଶନ ଶୋକୁ ଆଦି ରାନୀ ଫାଉଣ୍ଡେସନ୍ ଦ୍ୱାରା ପରିଚାଳନା କରାଯାଇଥିଲା । ଅନ୍ୟ ଏକ ଆକର୍ଷଣ ଥିଲା ସିବରନ୍ ବେରିୱାଲଙ୍କ ନୃତ୍ୟ । ତାଙ୍କର ପାୱାର ପ୍ୟାକ୍ ପ୍ରଦର୍ଶନକୁ ଅତିଥି ଏବଂ ଦର୍ଶକମାନେ ପ୍ରଶଂସା କରିଥିଲେ । ସବୁଠୁ ବଡ଼ କଥା ହେଲା ଏହି ମେଳା ସୋସିଆଲ ମିଡ଼ିଆରେ ଟ୍ରେଣ୍ଡ କରିଥିଲା । ମେଳାର ପରିବେଶ ସକାରାତ୍ମକ ଥିବାରୁ ଲୋକଙ୍କ ସୁଅ ଛୁଟୁଛି ।
