ଭୁବନେଶ୍ୱର, ନିରପେକ୍ଷ ଖବର: ତା.୨୦/୦୪: ଓଡିଶା ଓ ଛତିଶଗଡ ବସି ଆଲୋଚନା କଲେ ମହାନଦୀ ସମସ୍ୟାର ସମାଧାନ ହେବ ବୋଲି ଭାରତୀୟ ଜନତା ପାର୍ଟି ବାରମ୍ବାର କହିଛି । କିନ୍ତୁ ରାଜ୍ୟ ସରକାର ସେ ଦିଗରେ କୌଣସି ପଦକ୍ଷେପ ନେଇନାହାନ୍ତି ବରଂ କେନ୍ଦ୍ର ସରକାରଙ୍କ ଉଦ୍ୟମରେ ତତ୍କାଳୀନ କେନ୍ଦ୍ର ଜଳସମ୍ପଦ ମନ୍ତ୍ରୀ ଉମା ଭାରତୀ ଏକ ତ୍ରିପାକ୍ଷିକ ବୈଠକ କରିଥିଲେ । ଏହାପରେ ଓଡ଼ିଶା ସରକାର ମହାନଦୀ ସମସ୍ୟା ଆଗେଇବା କଥା, କିନ୍ତୁ ତାହା ସେ କରିନାହାନ୍ତି । ମହାନଦୀର ସମ୍ପର୍କରେ ରାଜ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଏକ କମିଟି ଅନୁଷ୍ଠିତ ହୋଇଥିଲା । ପରବର୍ତୀ ସମୟରେ ପୁନଃର୍ବାର ତତ୍କାଳୀନ ମନ୍ତ୍ରୀ ପ୍ରଦୀପ ଅମାତଙ୍କ ଅଧ୍ୟକ୍ଷତାରେ ଆଉ ଏକ କମିଟି ମଧ୍ୟ ଗଠନ ହୋଇଥିଲା । ଉଭୟ କମିଟି ଗଠନ ହେବା ଦିନଠାରୁ ଗୋଟିଏ ବି ବୈଠକ ନହେବା ଅତ୍ୟନ୍ତ ଦୁର୍ଭାଗ୍ୟଜନକ । ରାଜ୍ୟ ସରକାର କମିଟି ଗଠନ କରିଦେଇ ମହାନଦୀ ପ୍ରସଙ୍ଗକୁ ସମ୍ପୂର୍ଣ୍ଣ ଭୁଲିଗଲେ । କେବଳ ଗତ ନିର୍ବାଚନ ପୂର୍ବରୁ ରାଜନୈତିକ ଚର୍ଚ୍ଚାରେ ରହିବା ପାଇଁ ମହାନଦୀ ପାଇଁ କୁମ୍ଭୀର କାନ୍ଦଣା ସଦୃଶ ଦଳୀୟ ଭିତିରେ ବିଭିନ୍ନ ଲୋକଦେଖାଣିଆ କାର୍ଯ୍ୟକ୍ରମ କରିଥିଲେ । ଏଥିରୁ ମହାନଦୀ ସମ୍ପର୍କରେ ରାଜ୍ୟ ସରକାରଙ୍କର ଆଦୌ ଆନ୍ତରିକତା ନଥିବା ସ୍ପଷ୍ଟ ବାରି ହୋଇପଡୁଛି ବୋଲି ରାଜ୍ୟ ସାଧାରଣ ସମ୍ପାଦିକା ଡ.ଲେଖାଶ୍ରୀ ସମାନ୍ତସିଂହାର କହିଛନ୍ତି ।
ଓଡ଼ିଶା ସରକାରଙ୍କର ଗଣତାନ୍ତ୍ରିକ ବିଧିବ୍ୟବସ୍ଥାରେ କୌଣସି ଭରସା ନାହିଁ । ରାଜ୍ୟ ସରକାର ସର୍ବଦଳୀୟ ବ୍ୟବସ୍ଥାକୁ ସମ୍ମାନ ଦିଅନ୍ତି ନାହିଁ । ସର୍ବଦଳୀୟ କମିଟି ମହାନଦୀ ସମସ୍ୟା ଆକଳନ କରି ସମସ୍ୟାର ବାଟ ବାହାର କରିବାର କଥା ହୋଇଥିଲା ତାକୁ ମୁଖ୍ୟମନ୍ତ୍ରୀ ପ୍ରଶ୍ରୟ ଦେଇନାହାନ୍ତି । ଓଡ଼ିଶାବାସୀଙ୍କ ଜଳକୁ ସୁରକ୍ଷିତ ରଖିବା ପାଇଁ ରାଜ୍ୟ ସରକାରଙ୍କ କୌଣସି ଯୋଜନା ନାହିଁ ବୋଲି ଡ. ଲେଖାଶ୍ରୀ କହିଛନ୍ତି ।
ରାଜ୍ୟ ସରକାରଙ୍କ ଅଧିକାରୀମାନେ କହିଥିଲେ ଛତିଶଗଡ ୧୦୦୦ ବ୍ୟାରେଜ କଲେ ବି ଆମର କିଛି ସମସ୍ୟା ହେବ ନାହିଁ । ରାଜ୍ୟ ସରକାର ନିଜେ ଜାଣିନାହାନ୍ତି ସମସ୍ୟା କେଉଁଠି ରହିଛି । ୨୩ବର୍ଷ ଭିତରେ ଓଡ଼ିଶା ସରକାର ମହାନଦୀ ଜଳକୁ ସଂରକ୍ଷଣ, ବର୍ଷା ଜଳକୁ ବ୍ୟବହାର କରିବା ପାଇଁ ଗୋଟିଏ ବି ବ୍ୟାରେଜ କରିନାହାନ୍ତି । ରାଜ୍ୟ ସରକାର ଅଂହକାର ଓ ଅହନୀକା ଭିତରେ ରହୁଛନ୍ତି । ରାଜ୍ୟ ସରକାର ତୁରନ୍ତ ସର୍ବଦଳୀୟ ବୈଠକ ଡାକି ସମସ୍ୟାର ସମାଧାନ ବାହାର କରନ୍ତୁ । ରାଜ୍ୟ ସରକାର ଜଳ ସଂରକ୍ଷଣ ପାଇଁ କଣ ପଦକ୍ଷେପ ନେଇଛନ୍ତି ତାହାର ଉତର ତୁରନ୍ତ ରାଜ୍ୟ ସରକାର ଦିଅନ୍ତୁ ବୋଲି ଡ.ଲେଖାଶ୍ରୀ ଦାବି କରିଛନ୍ତି ।
