ଜଙ୍ଗଲ ବୃଦ୍ଧି କରାଯାଉ…..

ଭୁବନେଶ୍ୱର: ନିରପେକ୍ଷ ଖବର, ତା ୧୪/୦୨/୨୦୧୯, ଆଜି ଅବସରପ୍ରାପ୍ତ ବନବିଭାଗ ଅଧିକାରୀଙ୍କ ସୋସାଇଟି(ଓଡ଼ିଶା) ପକ୍ଷରୁ ଓଡ଼ିଶା ବନବିଭାଗ ଏବଂ ଓଡ଼ିଶା ମହାନଦୀ କୋଲଫିଲ୍‌ଡ଼ ଲିମିଟେଡ଼୍‌ ସହଯୋଗରେ ‘ଓଡ଼ିଶା, ଦି ଗ୍ରୀନ୍‌ ଲିଡର’ ଶୀର୍ଷକ ଏକ କର୍ମଶାଳା ଅନୁଷ୍ଠିତ ହୋଇଯାଇଛି । ଶିଳ୍ପାୟନ ଏବଂ ଜନସଂଖ୍ୟା ବୃଦ୍ଧି ଯୋଗୁଁ ଜଙ୍ଗଲ ଜମି ଉପରେ କ୍ରମାଗତ ଭାବରେ ଚାପ  ସୃଷ୍ଟି ହେଉଥିବାରୁ କିପରି ଅଧିକ ସବୁଜବଳୟ ସୃଷ୍ଟି କରାଯାଇପାରିବ ସେ ବିଷୟରେ ଉପସ୍ଥିତ ବିଶେଷଜ୍ଞମାନେ ସେମାନଙ୍କର ମତ ଉପସ୍ଥାପନ କରିଥିଲେ । ରାଜ୍ୟରେ ୪୪୦୪ ବର୍ଗ କିଲୋମିଟର ଜଙ୍ଗଲ ସୃଷ୍ଟି ହୋଇଥିଲେ ମଧ୍ୟ ଘନଜଙ୍ଗଲର ପରିମାଣରେ କିଛି ହ୍ରାସ ଘଟିଛି । ହାତୀ ଏବଂ ମନୁଷ୍ୟ ମଧ୍ୟରେ ସଂଘର୍ଷ ବୃଦ୍ଧି ପାଉଥିବା
ଦେଖାଯାଉଛି ଯେଉଁଥି ପାଇଁ ଉଚ୍ଚମାନର ବନୀକରଣ କାର୍ଯ୍ୟକ୍ରମକୁ ବ୍ୟାପକ କରିବା ଉପରେ ଗୁରୁତ୍ୱ ଦିଆଯାଉଛି । ଏହି କର୍ମଶାଳାରେ ଯୋଗଦେଇଥିବା ବିଶେଷଜ୍ଞମାନେ ଜଙ୍ଗଲ ବୃଦ୍ଧି ସହ ଅଧିକ
ଅଙ୍ଗାରକାମ୍ଳ ବିଶୋଧନ କରିପାରୁଥିବା ବୃକ୍ଷରୋପଣ ଉପରେ ଗୁରୁତ୍ୱାରୋପ କରିଥିଲେ । ଶାଳିଆ ବାଉଁଶ ଏହି ଧରଣର ଏକ ଉପଯୁକ୍ତ ବୃକ୍ଷ ହୋଇଥିବାରୁ ଏବଂ ଏହା ଆସବାବପତ୍ର ନିର୍ମାଣ ସହ
ଅନ୍ୟ କାର୍ଯ୍ୟରେ ମଧ୍ୟ ବ୍ୟବହାର ହେଉଥିବାରୁ ଏହି ଜାତୀୟ ଚାରା ଅଧିକ ମାତ୍ରାରେ ରୋପଣ କରିବା ନିମନ୍ତେ ମତପ୍ରକାଶ ପାଇଥିଲା ।
ଆହୁରି ମଧ୍ୟ ଏହି କର୍ମଶାଳାରେ ହେନ୍ତାଳ ବନ ବୃଦ୍ଧି ଉପରେ ଆଲୋଚନା ହୋଇଥିଲା । ମହାନଦୀ କୋଲଫିଲଡ୍‌, କାମ୍ପା ଓ ଅନ୍ୟ କର୍ପୋରେଟ୍‌ମାନେ ଯେଉଁ ସବୁଜିମା ସୃଷ୍ଟି କରିଛନ୍ତି ସେ
ବିଷୟରେ ଆଲୋଚନା ହୋଇଥିଲା । ସର୍ବଶେଷରେ ‘ସବୁଜ ଓଡ଼ିଶା’ ଲକ୍ଷ୍ୟ ହାସଲ ପଥରେ ଆମେ ଅଗ୍ରସର ହେଉଛେ ଏବଂ ଏଥିପାଇଁ ସମସ୍ତଙ୍କ ଉଦ୍ୟମ ଜାରି ରହିବା ଆବଶ୍ୟକ ବୋଲି
କର୍ମଶାଳାରେ ମତପ୍ରକାଶ ପାଇଥିଲା । ରାଜ୍ୟ ସରକାରଙ୍କ ପକ୍ଷରୁ ବନୀକରଣ କାର୍ଯ୍ୟକ୍ରମ ଅନ୍ତର୍ଗତ କରଞ୍ଜ, ବଡ଼ ଚାକୁଣ୍ଡା, ନିମ,
ଜାମୁ, ପିଆଶାଳ, ଗମ୍ଭାରୀ, ଅଁଳା, ମହୁଲ ଆଦି ସ୍ୱତନ୍ତ୍ର ବୃକ୍ଷ ରୋପଣ କରାଯିବା ସହ ନଣ୍ଡାପାହା ବନୀକରଣ, ସହରାଞ୍ଚଳ ବନୀକରଣ, ପଥପାଶ୍ୱର୍ ବନୀକରଣ, ବାଉଁଶ ଓ କାଜୁ ବନୀକରଣ,
ଜାତୀୟ ବନୀକରଣ କାର୍ଯ୍ୟକ୍ରମ, ଜଙ୍ଗଲ ବାହାର ବନୀକରଣ, କୃଷିକ୍ଷେତ୍ର ଚତୁଃପାଶ୍ୱର୍ରେ ବିଭିନ୍ନଚାରାରୋପଣ ଓ ଶିକ୍ଷାନୁଷ୍ଠାନ ଏବଂ ସରକାରୀ ଅନୁଷ୍ଠାନଗୁଡ଼ିକ ପରିସରରେ ଗଛ ଲଗାଇବା ପାଇଁ
ବିନାମୂଲ୍ୟରେ ଚାରା ପ୍ରଦାନ କରାଯାଉଛି । ଆଜିର କର୍ମଶାଳାରେ ଉଦ୍‌ଘାଟନୀ ପର୍ବରେ ଓଡ଼ିଶା ଅବସରପ୍ରାପ୍ତ ବନବିଭାଗ ଅଧିକାରୀ
ସୋସାଇଟିର ଅଧ୍ୟକ୍ଷ ଶ୍ରୀ ବି.ସି.ପାଲ୍‌, ଅତିରିକ୍ତ ମୁଖ୍ୟ ଶାସନ ସଚିବ(ବନ) ଶ୍ରୀ ସୁରେଶ ଚନ୍ଦ୍ର ମହାପାତ୍ର, ପିସିସିଏଫ୍‌ ଡ. ଦେବବ୍ରତ ସ୍ୱାଇଁ, ବନ୍ୟପ୍ରାଣୀ ପିସିସିଏଫ୍‌ ଡ. ସମ୍ବିତ୍‌ ତି୍ରପାଠୀ, ଅତିରିକ୍ତ ପିସିସିଏଫ୍‌ ଡ. ଏ. କେ. ପାଠକ, ଅତିରିକ୍ତ ପିସିସିଏଫ୍‌(କେନ୍ଦ୍ରୀୟ) ଶ୍ରୀ ଆର୍‌.କେ. ଦେ,  ସୋସାଇଟିର ଉପସଭାପତି ଡ. ବି.କେ. ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ ।