ମେକ୍ ଇନ୍ ଓଡ଼ିଶାର ଦ୍ଵିତୀୟ ସଂସ୍କରଣରେ ଓଡ଼ିଶାକୁ ମିଳିଲା ୪ ଲକ୍ଷ ୧୯ ହଜାର ୫୭୪ କୋଟି ଟଙ୍କା ନିବେଶର ପ୍ରତିଶୃତି..
ମେକ୍ ଇନ୍ ଓଡ଼ିଶାର ଦ୍ଵିତୀୟ ସଂସ୍କରଣରେ ଓଡ଼ିଶାକୁ ୪ ଲକ୍ଷ ୧୯ ହଜାର ୫୭୪ କୋଟି ଟଙ୍କା ନିବେଶର ପ୍ରତିଶୃତି ମିଳିଛି। ଏହାକୁ ଏକ କଳ୍ପନାତୀତ ସଫଳତା ବୋଲି ମୁଖ୍ୟମନ୍ତ୍ରୀ ଅଭିହିତ କରିଛନ୍ତି। ସେ କହିଛନ୍ତି ମେକ୍ଇନ୍ ଓଡ଼ିଶାର ଦ୍ଵିତୀୟ ସଂସ୍କରଣ ରାଜ୍ୟରେ ୨୦୨୫ ସୁଦ୍ଧା ଅଢ଼େଇ ଲକ୍ଷ କୋଟି ଟଙ୍କା ନିବେଶ ପ୍ରତିଶୃତି ହାସଲ ପାଇଁ ଲକ୍ଷ୍ୟ ରଖିଥିଲା। କିନ୍ତୁ ଏବେ ତାହା ପାଖାପାଖି ଦୁଇଗୁଣା ହୋଇଛି।
ଏହି ନିବେଶ ପ୍ରସ୍ତାବ ତାଲିକାରେ ସବୁଠାରୁ ଆଗରେ ରହିଛନ୍ତି ହଲଦିଆ ପେଟ୍ରୋ କେମିକାଲ୍ସ। ଏହି ଶିଳ୍ପ ରାଜ୍ୟରେ ୭୦ ହଜାର କୋଟି ଟଙ୍କା ନିବେଶ କରିବାକୁ ପ୍ରତିଶୃତି ଦେଇଛି। ଠିକ୍ ସେହିପରି ଜେଏସ୍ପିଏଲ୍ ପକ୍ଷରୁ ୬୦ ହଜାର ୯୫୦ କୋଟି, ମହାନଦୀ କୋଲ୍ ଫିଲ୍ଢସ୍ ପକ୍ଷରୁ ୫୮ହଜାର ୯୯୭ କୋଟି, ତାଇୱାନ୍ର ଏକ କମ୍ପାନୀ ୪୩ ହଜାର କୋଟି ଟଙ୍କା ନିବେଶ ପ୍ରସ୍ତାବ ଦେଇଥିବା ବେଳେ ଷ୍ଟିଲ୍ ଅଥରିଟି ଅଫ୍ ଇଣ୍ଡିଆ ରାଜ୍ୟପାଇଁ ୪୧ ହଜାର ୪୦୦ କୋଟି ଟଙ୍କା ନିବେଶ ପ୍ରସ୍ତାବ ଆଣିଛି।
ମଙ୍ଗଳବାରଦିନ ମେକ୍ଇନ୍ ଓଡ଼ିଶାର ସମାବର୍ତ୍ତନ ଉତ୍ସବରେ ମୁଖ୍ୟମନ୍ତ୍ରୀ ନିଜର ବକ୍ତବ୍ୟ ରଖିଥିଲେ। ସେ କହିଛନ୍ତି, ତୃତୀୟ ସଂସ୍କରଣ ପାଇଁ ଓଡ଼ିଶା ପ୍ରସ୍ତୁତ ହେଉଛି। ଏହା ୨୦୨୦ ମସିହାରେ ଅନୁଷ୍ଠିତ ହେବ। ସେହିବର୍ଷ ନଭେମ୍ବର ୩୦ରୁ ଡିସେମ୍ବର ୪ ତାରିଖ ଯାଏ ଏହିପରି ଏକ ସମାବେଶ ଆୟୋଜନ କରାଯିବ।
ରାଜ୍ୟର ୧୫ଟି କ୍ଷେତ୍ରରେ ଏହି ପୁଞ୍ଜି ନିବେଶ ପ୍ରସ୍ତାବ ଆସିଛି। ଯେଉଁଥିରେ ପେଟ୍ରୋକେମିକାଲ୍ସ, ରାସାୟନିକ ସାର ପ୍ରସ୍ତୁତି, ଖାଦ୍ୟ ପ୍ରକିୟାକରଣ, ସ୍ଵାସ୍ଥ୍ୟସେବା, ପର୍ଯ୍ୟଟନ, ନବୀକରଣଯୋଗ୍ୟ ଶକ୍ତି, ଇଲେକ୍ଟ୍ରନିକ୍ସ ପ୍ରଭୃତି ଗୁରୁତ୍ଵପୂଣ୍ଣ ସ୍ଥାନ ବହନ କରିଛନ୍ତି। ଏହି ପ୍ରସ୍ତାବିତ ପୁଞ୍ଜି ନିବେଶ ସଫଳ ହେଲେ ରାଜ୍ୟରେ ୫ ଲକ୍ଷ ୯୧ ହଜାର ନୂତନ ନିଯୁକ୍ତି ସୃଷ୍ଟି ହୋଇପାରିବ ବୋଲି ଆଶା କରାଯାଇଛି।
୧୪ ତାରିଖରେ ଶେଷ ହେବାକୁ ଥିବା ମେକ୍ ଇନ୍ ଓଡ଼ିଶାର ଦ୍ଵିତୀୟ ସଂସ୍କରଣରେ ୫୦୭୪ ଜଣ ଶିଳ୍ପ କପ୍ତାନ ଯୋଗ ଦେଇଥିଲେ। ତୃତୀୟ ଦିନ ସୁଦ୍ଧା ଆୟୋଜିତ ସ୍ଥାନକୁ ୩୧ହଜାର ୮୦୬ ଜଣ ଦର୍ଶକ ପରିଦର୍ଶନ କରିଥିବା ଜଣାପଡ଼ିଛି।
