ଭୁବନେଶ୍ୱର,ନିରପେକ୍ଷ ଖବର: ୨୯/୧-ଆଦିବାସୀମେଳାର ମୁଖ୍ୟ ଆକର୍ଷଣ ସାଜିଛି ପାରମ୍ପରିକ ଜନଜାତି ନୃତ୍ୟ । ପ୍ରତ୍ୟେହ ସଂଧ୍ୟା ୬ଟାରୁ ୮.୩୦ ପର୍ଯ୍ୟନ୍ତ ବାଦ୍ୟର ତାଳେ ତାଳେ ଜନଜାତି କଳାକାରଙ୍କ ନୃତ୍ୟ ଦେଖିବାପାଇଁ ଦର୍ଶକଙ୍କ ବେଶ୍ ଭିଡ ଜମୁଛି । ଗତକାଲି ମେଳାରେ ପାରଳାଖେମୁଣ୍ଡିର ସଉରା ନୃତ୍ୟ, ବଣାଇର ମୁଣ୍ଡାରି ଓ କିସାନ ନୃତ୍ୟ, ନବରଙ୍ଗପୁରର ଆଦିବାସୀ ନୃତ୍ୟ ଦର୍ଶକଙ୍କୁ ବିମୁଗ୍ଧ କରିଥିଲା । ପୂର୍ବ ଦୁଇଦିନରେ ମଧ୍ୟ ଅନ୍ୟ ଜିଲ୍ଲାରେ କଳାକାରମାନେ ସେମାନଙ୍କର ନୃତ୍ୟ ପରିବେଷଣ କରିଥିଲେ ।
ଜାନୁୟାରୀ ୨୬ ତାରିଖରୁ ଫେବୃୟାରୀ ୯ ତାରିଖ ପର୍ଯ୍ୟନ୍ତ ଚାଲୁଥିବା ଆଦିବାସୀମେଳାରେ ପୂର୍ବବର୍ଷ ଭଳି ଜାତୀୟ ଆଦିବାସୀ ନୃତ୍ୟ ଜାନୁୟାରୀ ୩୧ ରୁ ଫେବୃୟାରୀ ୨ ଯାଏଁ ମହୋତ୍ସବ ଅନୁଷ୍ଠିତ ହେଉଛି । ମେଳା ପରିସରରେ ସ୍ଥାପିତ ସୁସଜ୍ଜିତ ମଣ୍ଡପରେ ରାଜ୍ୟ ତଥା ରାଜ୍ୟ ବାହାରୁ ଆସିଥିବା ଆଦିବାସୀ କାଳକାରମାନେ ସେମାନଙ୍କର ନୃତ୍ୟ ପରିବେଷଣ କରିବା ସମୟରେ ଦର୍ଶକଙ୍କ ଭିଡ ବାରିହୋଇ ପଡୁଛି । ପାରମ୍ପରିକ ବାଦ୍ୟର ତାଳେ ତାଳେ ଆଦିବାସୀ ରମଣୀଙ୍କ ଚମତ୍କାର ନୃତ୍ୟ କେବଳ ଲୋକଙ୍କ ଦୃଷ୍ଟି ଆକର୍ଷଣ କରୁନାହିଁ ଅନେକ ଏହାକୁ ନିଜ ନିଜ କ୍ୟାମେରାରେ ମଧ୍ୟ ତୋଳି ଧରୁଛନ୍ତି । ଗୋଟିଏ ମଂଚରେ ଏତେ ସଂଖ୍ୟାରେ ଜନଜାତି କଳାକାରଙ୍କ ନୃତ୍ୟ ଦେଖିବା କେବଳ ଆଦିବାସୀ ମେଳାରେ ସମ୍ଭବ ହୋଇଥାଏ ବୋଲି ମେଳା ଦାୟିତ୍ୱରେ ଥିବା ଅନୁସୂଚିତ ଜାତି ଓ ଜନଜାତି କଲ୍ୟାଣ ତାଲିମ ପ୍ରତିଷ୍ଠାନର ନିର୍ଦ୍ଦେଶକ ତଥା ସ୍ୱତନ୍ତ୍ର ସଚିବ ଡକ୍ଟର ଅଖିଳ ବିହାରୀ ଓତା ସୂଚନା ଦେଇଛନ୍ତି ।
ସେ କହିଛନ୍ତି ଯେ ମେଳା ପରିସରରେ ପ୍ରତିଦିନ ୭ଟି ନୃତ୍ୟ ପରିବେଷଣର ବ୍ୟବସ୍ଥା ହୋଇଛି । ଏଥିପାଇଁ ଓଡିଶାର ବିଭିନ୍ନ ଜନଜାତି କଳାକାରଙ୍କ ସହିତ ଆସାମ, ଛତିଶଗଡ, ମହରାଷ୍ଟ୍ର, ନାଗାଲାଣ୍ଡ, ମିଜୋରାମ, ସିକିମ୍, ଗୁଜୁରାଟ ଓ ହିମାଚଳ ପ୍ରଦେଶର ଜନଜାତି କଳାକାରମାନେ ଏଥିରେ ସାମିଲ ହୋଇଛନ୍ତି ।
ଆଦିବାସୀମେଳାର ତୃତୀୟ ସଂଧ୍ୟାରେ ପ୍ରାୟ ଏକ ଲକ୍ଷ ଦର୍ଶକଙ୍କ ସମାଗମ ହୋଇଥିବାବେଳେ ଜନଜାତି ନୃତ୍ୟ ସହିତ ସେମାନେ ମେଳାରେ ବୁଲି ବୁଲି ଆଦିବାସୀ ହାଟରୁ ବିଭିନ୍ନ ସାମଗ୍ରୀ କିଣିଥିଲେ । ଏଥି ସହିତ ମେଳା ପରିସରରେ ଚାଲିଥିବା ଜାତୀୟ ଜନଜାତି ଖାଦ୍ୟ ଉତ୍ସବର ମଧ୍ୟ ମଜା ଉଠାଇଥିଲେ । ମେଳାର ତୃତୀୟ ଦିନରେ ୩୦ଲକ୍ଷ ଟଙ୍କାରୁ ଉର୍ଦ୍ଧ୍ୱ ଟଙ୍କାର କାରବାର ହୋଇଥିବାବେଳେ ଆଗାମୀଦିନରେ ଦର୍ଶକଙ୍କ ସଂଖ୍ୟା ବୃଦ୍ଧି ସହିତ କାରବାର ବଢିବ ବୋଲି କର୍ତ୍ତୃୃପକ୍ଷ ଆଶାନ୍ୱିତ ।
