କାରଗିଲରେ ସହିଦ୍ ହୋଇଥିବା ଯବାନଙ୍କୁ ମିଳୁନି ଉଚିତ ସମ୍ମାନ…

*ପ୍ରଶାସନ ପକ୍ଷରୁ ପ୍ରତିବର୍ଷ ଶ୍ରାଦେ୍ଧାବାର୍ଷିକ ପାଳନ କରିବାକୁ ପିତାମାତାଙ୍କ ଗୁହାରୀ…

ଭଦ୍ରକ, ନିରପେକ୍ଷ ଖବର:(ତିହିଡି) ୨୦ ଜୁଲାଇ : କାର୍ଗିଲ ଯୁଦ୍ଧରେ ସହିଦ ହୋଇଥିବା ଭଦ୍ରକ ଜିଲ୍ଲା ଅଚକ ପଞ୍ଚାୟତ ଉତ୍ତରବାହା ଗ୍ରାମର ସହିଦ୍ ତାପସ ମଲ୍ଲିକଙ୍କ ପ୍ରତିମୂରତ୍ତି ଅବହେଳିତ ହୋଇ ପଡିରହିଛି । ଏମିତିକି ତାପସଙ୍କ ବାପା ଓ ମାଆଙ୍କ ଜୀବନ ଦୁଃଖ ଓ ଯନ୍ତ୍ରଣାରେ ବିତୁଛି। ସହିଦଙ୍କ ପ୍ରତିମୂର୍ତ୍ତୀ ଏବେ ପଶୁଙ୍କ ଚରାଭୂଇଁରେ ପରିଣତ ହୋଇଛି। ସେହିପରି ତାଙ୍କ ଶ୍ରାଦେ୍ଧାତ୍ସବରେ ପ୍ରଶାସନିକ ସ୍ତରରେ କୌଣସି ଶ୍ରଦ୍ଧାଞ୍ଜଳୀ ପ୍ରଦାନ କରିବା ଲାଗି କାର୍ପଣ୍ୟତା ପ୍ରକାଶ ପାଇଥିବା ବେଳେ ସାଧାରଣ ଲୋକଙ୍କର ମଧ୍ୟ ଆବିଳତା ନଥିବା ପରି ଲାଗୁଛି । ଦେଶ ଜାତି ପାଇଁ ନିଜର ଜୀବନକୁ ତିଳତିଳ କରି ଉତ୍ସର୍ଗ କରି ଦେଇଥିବା ଏହି ସହିଦ୍ ଜବାନଙ୍କୁ ସରକାରୀ କିମ୍ବା ରାଜନୈତିକ ସ୍ତରରେ ଯଥୋଚିତ ସମ୍ମାନ ମିଳୁନଥିବା ଏହାର ଏକ ନଗ୍ନ ଉଦାହରଣ ଦେଖିବାକୁ ମିଳିଛି । ବାପା ଅକ୍ଷୟ ମଲ୍ଲିକ ଓ ମାତା ସୀତାରାଣୀଙ୍କ ସାନପୁଅ ତାପସ ଶ୍ରୀନଗର ଲିମାପୋଷ୍ଟରେ ଅପରେସନ ପରାକ୍ରମରେ ଗତ ତା ୨୦.୭.୨୦୦୫ରେ ଶହୀଦ ହୋଇଥିଲେ । ୨୦୦୬ ମସିହାରେ ତାପସ ପାଠ ପଢିଥିବା ବିଦ୍ୟାଳୟ ସମ୍ମୁଖରେ ତାଙ୍କ ଉଦ୍ଦେଶ୍ୟରେ ଗ୍ରାମବାସୀଙ୍କ ଉଦ୍ୟମରେ ଏକ ସିମେଣ୍ଟ କଂକ୍ରିଟ ମୂର୍ତ୍ତୀ ନିର୍ମାଣ କରାଯାଇଥିଲା । କାଳକ୍ରମେ ତାହା ବିକୃତ ହୋଇଯାଇଥିଲା । ଏ ସମ୍ପର୍କରେ ପ୍ରଶାସନକୁ ଅବଗତ କରାଯାଇଥିଲେ ମଧ୍ୟ କୌଣିସ ସୁଫଳ ମିଳିନଥିଲା । ଏପରିକି ତାପସ ଯୁଦ୍ଧରେ ସହିଦ ହେବ ପରେ ତାଙ୍କର ସ୍ତ୍ରୀ ସମସ୍ତ ଟଙ୍କା ପଇସା ନେଇ ଶାଶୁ ଶଶୁରଙ୍କୁ ଛାଡି ଅନ୍ୟତ୍ର ରହୁଥିବା ଜାଣିବାକୁ ମିଳିଛି। ଫଳରେ ପୁତ୍ର ଛେଉଣ୍ଡ ହୋଇଥିବା ବାପା ଓ ମାଆଙ୍କ ଜୀବନ ଦୁଃଖ କଷ୍ଟ ରେ କଟୁଛି। ପୁଅକୁ ଜନ୍ମ କରି ବି ବାପା ମାଆ କ୍ଷତିପୂରଣ ପାଇବାରୁ ବଞ୍ଚିତ ଥିବା ଅଭିଯୋଗ ହୋଇଛି।ନିର୍ବାଚନ ପୂର୍ବରୁ କେତେ ନେତା ଓ ମନ୍ତ୍ରୀ ସହିଦ ତାପଶଙ୍କ ପ୍ରତିମୂର୍ତ୍ତୀ ସ୍ଥାପନ କରିବା ପାଇଁ ମିଥ୍ୟ ପ୍ରତିଶୃତି ମଧ୍ୟ ଦେଇଚାଲିଥିଲେ । ପରେ ସହିଦ୍ ଭଗତସିଂଙ୍କ ଜୟନ୍ତୀ ଅବସରରେ ୨୦୧୭ ମସିହାରେ ଭଗତସେନା ପକ୍ଷରୁ ସେଠାରେ ପ୍ରତିମୂର୍ତ୍ତୀ ସ୍ଥାପନ କରାଯାଇଛି । ହେଲେ ଏହି ପ୍ରତିମୂର୍ତ୍ତୀ ଖୋଲାମେଲା ହୋଇ ପଡି ରହିଛି । ପୁତ୍ର ହରାଇ ପିତା ଅକ୍ଷୟ ପ୍ରଥମେ ତାଙ୍କ ଶ୍ରାଦ୍ଧ ବାର୍ଷିକରେ ପ୍ରତିମୂର୍ତ୍ତୀକୁ ସଫାସୁତୁରା କରି ଫୁଲ ମାଳ ଦେଉଥିଲେ ହେଲେ କିଛି ବର୍ଷ ପରେ କୋହ ସମ୍ଭାଳି ନପାରିବାରୁ ତାହାବି ବନ୍ଦ ହୋଇଯାଇଛି ।ଏହି ପ୍ରତିମୂର୍ତ୍ତୀ ଉପରେ ଛାତ ପଡିବା ସହିତ ବ୍ଲକ ସ୍ତରୀୟ ଏକ କମିଟି ଗଠନ କରାଯାଇ ପ୍ରତିବର୍ଷ ଶ୍ରାଦ୍ଧ ବାର୍ଷିକ ପାଳନ କରାଗଲେ ଏହି ଅଞ୍ଚଳର ତାପସଙ୍କ ସର୍ବଦା ମନେ ରଖାଯାଇ ପାରିବ ବୋଲି ସ୍ଥାନୀୟ ଲୋକ ଦାବି କରିଛନ୍ତି।