ପ୍ୟାରିସ୍ : ବିଶ୍ୱ ଉଷ୍ଣତା ବର୍ତ୍ତମାନ ସମଗ୍ର ବିଶ୍ୱ ଲାଗି ଏକ ବନ ଚାଲେଞ୍ଜରେ ପରିଣତ ହୋଇଯାଇଛି । ଏହାଯୋଗୁଁ ଦିନକୁ ଦିନ ନୂଆନୂଆ ସମସ୍ୟାମାନ ଉପୁଜିବା ଆରମ୍ଭ କରିଛି । ବିଶ୍ୱ ଉଷ୍ଣତା ଯୋଗୁଁ ସୃଷ୍ଟ ଖାଦ୍ୟ ଓ ଜଳାଭାବ ଜନସାଧାରଣଙ୍କ ସମୂହ ସ୍ଥାନାନ୍ତର, ସମ୍ବଳ ଲାଗି ପ୍ରତିଯୋଗିତା ବିଶ୍ୱରେ ବିବାଦ, ଚରମବାଦ ଏବଂ ଆତଙ୍କବାଦ ସୃଷ୍ଟି ହେବାର ପ୍ରମୁଖ କାରଣ ବୋଲି ଏକ ଅଧ୍ୟୟନ ପରେ ସତର୍କ କରାଯାଇଛି । ବିଶ୍ୱସ୍ତରର ବୈଜ୍ଞାନିକ, ନୀତି ଅଧ୍ୟୟନକାରୀ, ଅର୍ଥନୈତିକ ଏବଂ ସାମରିକ ସଙ୍କଟ ବିଶେଷଜ୍ଞମାନଙ୍କୁ ନେଇ ଏକ ପ୍ରତିନିଧି ଦଳ “କ୍ଲାଇମେଟ୍ ଚେଞ୍ଜ, ଏ ରିସ୍କ ଆସେସ୍ମେଣ୍ଟ” ଶୀର୍ଷକରେ ଉତ୍ତପ୍ତ ବିଶ୍ୱରେ ମାନବ ଜାତିର ଭବିଷ୍ୟତର ଏକ ଗମ୍ଭୀର ଚିତ୍ର ପ୍ରକାଶ କରିଛନ୍ତି । ୧୧ଟି ଦେଶ ୪୦ ବିଶେଷଜ୍ଞଙ୍କୁ ନେଇ ଏହି ଅଧ୍ୟୟନ କରାଯାଇଥିଲା । ଏଥିରେ ଆହୁରି ମଧ୍ୟ ଉଲ୍ଲେଖ ରହିଛି ଯେ, ତାପମାତ୍ରା ବୃଦ୍ଧି ଏବଂ ସମୁଦ୍ର ଜଳସୀମା ହ୍ରାସ ପାଇବା ଯୋଗୁଁ ଉର୍ବର ଜମି କମିବାରେ ଲାଗିଛି । ପରିଣାମ ସ୍ୱରୂପ ମଣିଷ ମଣିଷ ମଧ୍ୟରେ ସଂଘର୍ଷ ଲାଗି ରହୁଛି । ମଧ୍ୟପ୍ରାଚ୍ୟ ଏବଂ ଆଫ୍ରିକାରେ ବିଭିନ୍ନ ସମୟରେ ଲାଗି ରହୁଥିବା ହିଂସାକାଣ୍ଡକୁ ନେଇ ବିଶେଷଜ୍ଞମାନେ ଏହି ମତାମତ ଦେଇଛନ୍ତି । ଜଳାଭାବ ଏବଂ ଉର୍ବର ଜମିର ଅଭାବ ଚରମବାଦ ଏବଂ ଆତଙ୍କବାଦ ଭଳି ତତ୍ତ୍ୱକୁ ଜନ୍ମ ଦେଇଛି । ଯାହା ଜାତୀୟ ତଥା ଆନ୍ତର୍ଜାତୀୟ ସୁରକ୍ଷା ପ୍ରତି ବଡ଼ ବିପଦ । ସେହିପରି ଜୀବନ ଜୀବିକା ଲାଗି ଲୋକେ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ସ୍ଥାନାନ୍ତର ହେବା ଏବେ ବଡ଼ ସମସ୍ୟା ରୂପେ ଉଭା ହୋଇଛି । ଜଳାଭାବ, ଖାଦ୍ୟାଭାବ, ବିବାଦ ଯୋଗୁଁ ଲୋକେ ଦେଶାନ୍ତର ଗମନ କରିବା ସହିତ ଶରଣାର୍ଥୀ ଭାବେ ଜୀବନ ଯାପନ କରିବାକୁ ବାଧ୍ୟ ହେଉଛନ୍ତି ।