ବାରିପଦା(ନିରପେକ୍ଷ ଖବର) ତା-୧୪/୦୮-ମୋତେ ଯେତେ ମାଠିବୁ ମାଠ ମୁଁ ସେଇ ଦରପୋଡା କାଠ। ଏ କଥା କହିବାର କାରଣ କଣ ଆପଣମାନେ ଜାଣିଛନ୍ତି ତ ! ଆମେ କହୁଛୁ ମୟୁରଭଞ୍ଜ ଜିଲ୍ଲାର ବିଜେଡି ନେତାଙ୍କର ମହାମାରୀ କରୋନା ସଂକ୍ରମଣ ରୋକିବାର ପ୍ରୟାସ କଥା । ଜିଲ୍ଲାରେ ଦିନକୁ ଦିନ କରୋନା ସଂକ୍ରମଣ ବଢିଚାଲିଥିବା ବେଳେ ରାଜ୍ୟ ସରକାର ଏହାକୁ ରୋକିବା ପାଇଁ ବିଭିନ୍ନ ପଦକ୍ଷେପ ନେଉଛନ୍ତି ।
ହେଲେ ମୟୁରଭଞ୍ଜରେ ବିଜେଡି ଦଳର ନେତାମାନେ ମୁଖ୍ୟମନ୍ତ୍ରୀଙ୍କ ନିର୍ଦ୍ଧେଶକୁ ତିଳେ ହେଲେ ଖାତିରି କରିବାକୁ ନାରାଜ। କରୋନା କଟକଣାକୁ ଉଲଂଘନ କରି ଦଳୀୟ ନେତାମାନେ ଲୋକଙ୍କ ଠାରୁ ରକ୍ତ ଶୋଷିବାରେ ବ୍ୟସ୍ତ। ରାଜ୍ୟରେ ଘୋର ରକ୍ତ ଅଭାବକୁ ଦୃଷ୍ଟିରେ ରଖି ମୋ-ପରିବାର ଦ୍ୱାରା ରକ୍ତଦାନ ଶିବିର ଆୟୋଜନ କରିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ। ହେଲେ ଏହି ନିର୍ଦ୍ଧେଶ ମାନିବାକୁ ନେତାମାନେ କିନ୍ତୁ କୁଂଥୁ କୁଂଥୁ । ଜିଲ୍ଲା ବିଜେଡି କାର୍ଯ୍ୟାଳୟ ତଥା ବିଜୁ ଭବନରେ କ୍ରାନ୍ତି ଦିବସରୁ ଆରମ୍ବ ହୋଇଥିବା ରକ୍ତଦାନ ଶିବିରରେ ନା ଥିଲା ସାମାଜିକ ଦୂରତା ନା କେହି କରୋନା କଟକଣାକୁ ମାନିଥିଲେ।
ଖୋଲାଖୋଲି ଉଲଂଘନ କରି ନେତା ଓ କର୍ମୀମାନେ ମୁଖ୍ୟମନ୍ତ୍ରୀଙ୍କ ପ୍ରିୟଭାଜନ ହେବାକୁ ଅପପ୍ରୟାସ ଜାରି ରଖିଛନ୍ତି। ସୂଚନାଯୋଗ୍ୟ,ଗତ କିଛିଦିନ ତଳେ ମୟୁରଭଞ୍ଜ ଜିଲ୍ଲାର ଦଳର ପର୍ଯ୍ୟବେକ୍ଷକ ପ୍ରଣବ ପ୍ରକାଶ ଦାସ(ବବି) ନିଜର ଜନ୍ମଦିନକୁ ବାରିପଦାରେ ପାଳନ କରିଥିଲେ। ସେଥିରେ ସେ ସାମାଜିକ ଦୂରତାକୁ ଭୃକ୍ଷେପ ନ କରି ବେଶ ହସ ଉଲ୍ଲାସରେ ଏହାକୁ ପାଳିଥିଲେ। ଯାହା ଗଣମାଧ୍ୟମରେ ମଧ୍ୟ ଖବର ପ୍ରକାଶିତ ହୋଇଥିଲା। ତଥାପି ଚେତିଲେନି ନେତା। ଜିଲ୍ଲା ପ୍ରଶାସନ ମଧ୍ୟ୍ୟ ଏ ଏବାବଦରେ କୌଣସି କାର୍ଯ୍ୟାନୁଷ୍ଠାନ ନେଲେନି। ତେବେ ସ୍ଥାନୀୟ ବିଜୁ ଭବନ ଠାରେ ଆୟୋଜିତ ରକ୍ତଦାନ ଶିବିରରେ ଦଳର ବରିଷ୍ଠ ନେତା,ଛାତ୍ର ନେତା, ଯୁବ ନେତା ଓ ମହିଳା ନେତ୍ରୀମାନେ ଏହାକୁ ଖୁଲମଖୁଲା ଉଲଘଂନ କରିଥିଲେ।
ରକ୍ତଦାନ କାର୍ଯ୍ୟକ୍ରମରେ କେହି ସାମାଜିକ ଦୂରତ୍ବ ରଖିନଥିବା ବେଳେ ମାସ୍କ ମଧ୍ୟ କେହି ବ୍ୟବହାର କରି ନ ଥିଲେ। ତେବେ ମୟୁରଭଞ୍ଜରେ କରୋନା ସଂକ୍ରମଣ ବଢିଚାଲିଥିବା ବେଳେ ବିଜୁ ଜନତା ଦଳର କର୍ମୀ ଓ ନେତାମାନେ କରୋନା କଟକଣାକୁ ଭାଙ୍ଗି ଚାଲିଛନ୍ତି। ହେଲେ ପ୍ରଶାସନ ନିରବ ଦ୍ରଷ୍ଟା ସାଜିଥିବା ସାଧାରଣରେ ଆଲୋଚନା ହେଉଛି।
