ଓଡ଼ିଶାବାସୀଙ୍କ ଭଲପାଇବା ଓ ସ୍ନେହଶ୍ରଦ୍ଧା ଦିଲ୍ଲୀରୁ ଓଡ଼ିଶା ଫେରାଇ ଆଣିଛି:ଅପରାଜିତା

ଓଡ଼ିଶାକୁ ଆଦର୍ଶ ଓ ସଶକ୍ତ ରାଜ୍ୟରେ ପରିଣତ କରିବା ପାଇଁ ‘ୱାନ୍ ଟିମ୍ ୱାନ୍ ଡ୍ରିମ୍’ ମନୋଭାବ ନେଇ କାମ କରିବାକୁ ପ୍ରଶାସିକାରୁ ରାଜନେତ୍ରୀ ପାଲଟିଥିବା ଅପରାଜିତା ଷଡ଼ଙ୍ଗୀ ଆହ୍ୱାନ ଦେଇଛନ୍ତି।
ଆଇଏଏସ ଚାକିରି ଛାଡ଼ି ବିଜେପିରେ ସାମିଲ ହୋଇଥିବା ଅପରାଜିତା ଷଡ଼ଙ୍ଗୀଙ୍କୁ ଆଜି ରାଜ୍ୟ ବିଜେପି କାର୍ଯ୍ୟାଳୟରେ ଭବ୍ୟ ସମ୍ବର୍ଦ୍ଧନା ଦିଆଯାଇଛି। କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମେତ ଦଳର ବହୁ ବରିଷ୍ଠ ନେତା ଓ ରାଜ୍ୟର ବିଭିନ୍ନ ଭାଗରୁ ଆସିଥିବା ନେତାମାନଙ୍କ ଉପସ୍ଥିତିରେ ଆୟୋଜିତ ଏକ ସମ୍ବର୍ଦ୍ଧନା ସଭାରେ ଉଦବୋଧନ ଦେଇ ଶ୍ରୀମତୀ ଷଡ଼ଙ୍ଗୀ କହିଥିଲେ ଯେ, ଓଡ଼ିଶାବାସୀଙ୍କ ଭଲପାଇବା ଓ ସ୍ନେହଶ୍ରଦ୍ଧା ତାଙ୍କୁ ଦିଲ୍ଲୀରୁ ଓଡ଼ିଶା ଫେରାଇ ଆଣିଛି।ସେ ଓଡ଼ିଶାର ବୋହୂ, ଓଡ଼ିଶା ତାଙ୍କର କର୍ମଭୂମି ଥିଲା ଏବେ ଏହା ତାଙ୍କର ଜନ୍ମଭୂମି ପାଲଟିଛି। ରାଜ୍ୟରେ ଦାରିଦ୍ର‌୍ୟ, ପିସି କାରବାର ଓ ଦୁର୍ନୀତି ପ୍ରସଙ୍ଗରେ ତଥ୍ୟ ରଖି ଅପରାଜିତା ରାଜ୍ୟ ସରକାରଙ୍କ ଅସଲ ଚେହେରାକୁ ପଦାରେ ପକାଇବା ସହ ଆଗାମୀ ଦିନରେ ଅଧିକ ତଥ୍ୟ ରଖିବେ ବୋଲି ରାଜ୍ୟ ସରକାରଙ୍କୁ ସତର୍କ କରାଇ ଦେଇଛନ୍ତି ।
ଆଦର୍ଶ ଓଡ଼ିଶା ଗଠନ ପାଇଁ ସମସ୍ତଙ୍କ ମଧ୍ୟରେ ନିଃସ୍ୱାର୍ଥପର ମନୋବୃତି, କଠିନ ପରିଶ୍ରମ, ଦୃଢ଼ ଇଚ୍ଛାଶକ୍ତି ଓ ଅଦ୍ୟମ ଉତ୍ସାହ ରହିବା ଜରୁରୀ। ଦୀର୍ଘ ୨୫ବର୍ଷ ଧରି ସେ ରାଜ୍ୟ ରାଜନୀତିକୁ ଅତ୍ୟନ୍ତ ପାଖରେ ଦେଖିବାର ସୁଯୋଗ ପାଇଛନ୍ତି। ଏବେ ସେ ଅନୁଭବ କରୁଛନ୍ତି ଯେ ରାଜ୍ୟରେ ପରିବର୍ତନର ଆବଶ୍ୟକତା ରହିଛି।ଆଉ ରାଜ୍ୟର ବିକାଶ କରିବାର କ୍ଷମତା କେବଳ ବିଜେପିର ରହିଛି। ରାଜ୍ୟକୁ ଅଗ୍ରଣୀ କରିବାକୁ ହେଲେ ବିଜେପି ହିଁ ଏକମାତ୍ର ବିକଳ୍ପ।କାରଣ ଏହା ଏକ ରାଷ୍ଟ୍ରୀୟ ଦଳ ଓ ସ୍ଥାୟୀ ଦଳ। ଏହାର କର୍ମୀମାନେ ରାଷ୍ଟ୍ର ସେବା ଓ ଗଠନର ଭାବନା ନେଇ କାମ କରିଥାନ୍ତି।
ସେ ରାଜନୀତିରେ ନିଜକୁ ପ୍ରଥମ ଶ୍ରେଣୀର ଛାତ୍ରୀ ବୋଲି କହିବା ସହ ସମସ୍ତଙ୍କଠୁ ସେ ରାଜନୀତି ଶିକ୍ଷା କରିବାକୁ ଇଚ୍ଛୁକ ଅଛନ୍ତି ବୋଲି କହିଛନ୍ତି । ତଥାପି ସମସ୍ତଙ୍କ ସ୍ନେହ ଓ ଶ୍ରଦ୍ଧା ତାଙ୍କୁ ଓଡ଼ିଶାବାସୀଙ୍କ ପାଇଁ କାମ କରିବା ନିମନ୍ତେ ସଂକଳ୍ପବଦ୍ଧ କରିଛି।ସେ ରାଜନୀତିରେ ସାମିଲ ହେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ବିଜେପି ଜାତୀୟ ଅଧ୍ୟକ୍ଷ ଅମିତ୍ ଶାହ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ କୃତଜ୍ଞତା ଜଣାଇଛନ୍ତି। ସମସ୍ତେ ମିଳିମିଶି ଓଡ଼ିଶା ଗଠନ ଦିଗରେ କାର୍ଯ୍ୟ କରିବା ପାଇଁ ଦଳୀୟ କର୍ମୀମାନଙ୍କୁ ସେ ଆହ୍ୱାନ କରିଛନ୍ତି।