ଭୁବନେଶ୍ୱର,ନିରପେକ୍ଷ ଖବର: ସେପ୍ଟେମ୍ବର ୭: କଟକ ରେଳ ଷ୍ଟେସନର ଆଧୁନିକୀକରଣ ଓ ଉନ୍ନତିକରଣ କାର୍ଯ୍ୟ ଯୋଗୁଁ ଦୁଇଟି ମେମୁ ଟ୍ରେନର ଚଳାଚଳରେ ସାମୟିକ ପରିବର୍ତ୍ତନ କରାଯାଇଛି। ପୂର୍ବତଟ ରେଳପଥ ପକ୍ଷରୁ ଜାରି ସୂଚନା ଅନୁଯାୟୀ, ଖୋର୍ଦ୍ଧା ରୋଡ୍ ରେଳ ମଣ୍ଡଳ ଅଧୀନରେ କଟକ ରେଳ ଷ୍ଟେସନରେ ଚାଲିଥିବା ଉନ୍ନତିକରଣ କାର୍ଯ୍ୟ ପରିପ୍ରେକ୍ଷୀରେ ଏହି ନିଷ୍ପତ୍ତି ନିଆଯାଇଛି।
ଟ୍ରେନ ନମ୍ବର ୬୮୪୩୪ ଗୁଣୁପୁର–କଟକ ମେମୁ ଟ୍ରେନଟି ଆସନ୍ତା ସେପ୍ଟେମ୍ବର ୮ ତାରିଖରୁ ଅକ୍ଟୋବର ୭, ୨୦୨୬ ପର୍ଯ୍ୟନ୍ତ କଟକ ଷ୍ଟେସନ ପରିବର୍ତ୍ତେ ମଞ୍ଚେଶ୍ୱର ରେଳ ଷ୍ଟେସନରେ ଯାତ୍ରା ସମାପ୍ତ କରିବ। ଅର୍ଥାତ୍, ଏହି ସମୟ ମଧ୍ୟରେ ଟ୍ରେନଟି ମଞ୍ଚେଶ୍ୱରରୁ କଟକ ପର୍ଯ୍ୟନ୍ତ ଚଳାଚଳ କରିବ ନାହିଁ।
ସେହିପରି, ଟ୍ରେନ ନମ୍ବର ୬୮୪୩୩ କଟକ–ଗୁଣୁପୁର ମେମୁ ଟ୍ରେନଟି ଉକ୍ତ ସମୟ ଅବଧିରେ କଟକ ପରିବର୍ତ୍ତେ ମଞ୍ଚେଶ୍ୱର ରେଳ ଷ୍ଟେସନରୁ ଯାତ୍ରା ଆରମ୍ଭ କରିବ।
ଫଳରେ, ସେପ୍ଟେମ୍ବର ୮ରୁ ଅକ୍ଟୋବର ୭ ପର୍ଯ୍ୟନ୍ତ ମଞ୍ଚେଶ୍ୱର ଓ କଟକ ମଧ୍ୟରେ ଏହି ଦୁଇ ମେମୁ ଟ୍ରେନର ସେବା ସାମୟିକ ଭାବେ ବାତିଲ ରହିବ।
ପୂର୍ବତଟ ରେଳପଥ ପକ୍ଷରୁ ଯାତ୍ରୀମାନଙ୍କୁ ଏହି ପରିବର୍ତ୍ତିତ ଟ୍ରେନ ସମୟସୂଚୀକୁ ଧ୍ୟାନରେ ରଖି ନିଜ ଯାତ୍ରା ଯୋଜନା କରିବାକୁ ପରାମର୍ଶ ଦିଆଯାଇଛି। ଯାତ୍ରା ପୂର୍ବରୁ ଟ୍ରେନ ଚଳାଚଳ ସମ୍ପର୍କିତ ସର୍ବଶେଷ ସୂଚନା ପାଇଁ ଯାତ୍ରୀମାନେ ନ୍ୟାସନାଲ୍ ଟ୍ରେନ୍ ଏନକ୍ୱାରୀ ସିଷ୍ଟମ୍ (NTES) କିମ୍ବା ରେଳବାଇର ଅଧିକାରିକ ୱେବସାଇଟ୍ ଯାଞ୍ଚ କରିବାକୁ କୁହାଯାଇଛି।
