ଜାତୀୟ ମହିଳା କମିଶନ, ନୂଆଦିଲ୍ଲୀଙ୍କ ସହଯୋଗରେ ଓଡ଼ିଶା ରାଜ୍ୟ ମହିଳା କମିଶନଙ୍କ ଦ୍ଵାରା ଏକ ଦିବସୀୟ ଆଲୋଚନାଚକ୍ର ଅନୁଷ୍ଠିତ
ଭୁବନେଶ୍ବର,ନିରପେକ୍ଷଖବର:ତା.୧୪/୧୨ ଭୁବନେଶ୍ୱର ସ୍ଥିତ ଦି ଓଡ଼ିଶା ଆସୋସିଏସନ୍ ଫର୍ ଦି ବ୍ଲାଇଣ୍ଡ୍ ପରିସରରେ ଜାତୀୟ ମହିଳା କମିଶନ, ନୂଆଦିଲ୍ଲୀଙ୍କ ସହଯୋଗରେ ଓଡ଼ିଶା ରାଜ୍ୟ ମହିଳା କମିଶନଙ୍କ ଦ୍ଵାରା ଏକ ଦିବସୀୟ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି । ଉକ୍ତ ଆଲୋଚନାଚକ୍ରରେ ମହିଳା ଥାନାର କାର୍ଯ୍ୟକାରିତା, ଦକ୍ଷତା ଓ ପ୍ରଭାବଶୀଳତା ସଂର୍ପକରେ ଆଲୋଚନା ହୋଇଥିଲା ।
ଏହି ଆଲୋଚନାଚକ୍ରରେ ମୁଖ୍ୟ ଅତିଥିଭାବେ ରାଜ୍ୟ ମହିଳା ଓ ଶିଶୁ ବିକାଶ ଏବଂ ମିଶନ ଶକ୍ତି ମନ୍ତ୍ରୀ ଶ୍ରୀମତୀ ବାସନ୍ତି ହେମନ୍ତମ, ଯୋଗଦାନ କରି ଆଲୋଚନାଚକ୍ରକୁ ଉଦ୍ଘାଟନ କରିଥିଲେ ।
ମନ୍ତ୍ରୀ ଶ୍ରୀମତୀ ହେମବ୍ରମ୍ ଉଦ୍ଘାଟନି ଭାଷଣରେ ରାଜ୍ୟ ସରକାର ମହିଳା ଓ ଶିଶୁମାନଙ୍କର ଅଧିକାର ସୁରକ୍ଷା ସଂପର୍କିତ ଯୋଜନା ବିଷୟରେ ବିସ୍ତୃତ ବିବରଣୀ ପ୍ରଦାନ କରିଥିଲେ । ଏହି ଆଲୋଚନାଚକ୍ରରେ ଓଡ଼ିଶା ରାଜ୍ୟ ମହିଳା କମିଶନର ଅଧ୍ୟକ୍ଷା ଡଃ ମିନତି ବେହେରା ଏହାର ଆଭିମୁଖ୍ୟ ସଂପର୍କରେ ସୂଚନା ପ୍ରଦାନ କରିଥିବାବେଳେ ଏଥିରେ ସମ୍ମାନୀତ ଅତିଥି ଭାବେ ରାଜ୍ୟ ସରକାରଙ୍କ ମହିଳା ଓ ଶିଶୁ ବିକାଶ ବିଭାଗର ଶାସନ ସଚିବ ଶ୍ରୀମତୀ ଶୁଭା ଶର୍ମା ଯୋଗଦାନ କରିଥିଲେ । ଏହି ଆଲୋଚନାଚକ୍ରରେ,
ଶ୍ରୀମତୀ ରେଖା ଲୋହାନୀ, ଅତିରିକ୍ତ ପୋଲିସ ଡ଼ିଜି, ମୁଖ୍ୟବକ୍ତା ଭାବେ ଯୋଗଦାନ କରିଥିଲେ। ମୁଖ୍ୟବକ୍ତା ଶ୍ରୀମତୀ ଲୋହାନୀ ମହିଳା ଓ ଶିଶୁମାନଙ୍କ ସୁରକ୍ଷା ନିମନ୍ତେ କାର୍ଯ୍ୟରତ ମହିଳା ଥାନା ଏବଂ ମହିଳା ଓ ଶିଶୁ ଡେସ୍କର କାର୍ଯ୍ୟକଳାପ ସଂପର୍କରେ ସଂକ୍ଷିପ୍ତ ସୂଚନା ପ୍ରଦାନ କରିବା ସହ ଏହାର କାର୍ଯ୍ୟକାରିତା, ଦକ୍ଷତା ଓ ପ୍ରଭାବଶୀଳତା ସଂପର୍କରେ ବିଷଦ ଆଲୋଚନା କରିଥିଲେ ଏବଂ ପୋଲିସ ବିଭାଗ ରାଜ୍ୟରେ ମହିଳା ଓ ଶିଶୁମାନଙ୍କ ସୁରକ୍ଷା ପାଇଁ ତତ୍ପରଥିବା ପ୍ରକାଶ କରିଥିଲେ । ଉକ୍ତ ଆଲୋଚନାଚକ୍ରରେ ରାଜ୍ୟର ବିଭିନ୍ନ ଜିଲ୍ଲାର ମହିଳା ଥାନା ଓ ମହିଳା ଓ ଶିଶୁ ଡେସ୍କରେ କାର୍ଯ୍ୟରତ ପୋଲିସ ଅଧିକାରୀ/କର୍ମଚାରୀମାନେ ଯୋଗଦାନ କରିଥିଲେ । ଏହି କାର୍ଯ୍ୟକ୍ରମରେ ଉତ୍କଳ ବିଶ୍ବ ବିଦ୍ୟାଳୟର ମନୋବିଜ୍ଞାନ ବିଭାଗର ପ୍ରାକ୍ତନ ପ୍ରଫେସ୍ର ଡଃ. ପି.କେ. ରଥ, ଶିମିଳିଗୁଡ଼ା ଡ଼ିଗ୍ରୀ ମହାବିଦ୍ୟାଳୟର ରିଡ଼ର ଡଃ. ଝାନସୀ ସିଂ ଏବଂ ଶ୍ରୀ ସୁଶିଲ୍ କୁମାର ରାୟ, ରେଜିଷ୍ଟାର, ଓଡ଼ିଶା ରାଜ୍ୟ ମହିଳା କମିଶନ ପ୍ରଭୃତି ବିଶେଷ ପର୍ସନ ଭାବେ ଯୋଗଦାନ କରିଥିଲେ । ଶେଷରେ ରାଜ୍ୟ ମହିଳା କମିଶନର ଆବାହକ ସଚିବ ଶ୍ରୀ ଏନ୍.ସି. ଜ୍ୟୋତି ରଞ୍ଜନ ନାୟକ ଧନ୍ୟବାଦ ଅର୍ପଣ କରିଥିଲେ ।
