ଭୁବନେଶ୍ୱର,ନିରପେକ୍ଷ ଖବର: ୧୫/୧୧/ ୨୦୧୯
ଶକ୍ତି, ଶିଳ୍ପ, ଏମ୍ଏସ୍ଏମ୍ଇ, ଗୃହ ମନ୍ତ୍ରୀ କ୍ୟାପ୍ଟେନ୍ ଦିବ୍ୟଶଙ୍କର ମିଶ୍ର ଆଜି ସତ୍ୟବାଦୀ ଥାନା ପରିଦର୍ଶନ କରିଛନ୍ତି । ଏହି ପରିଦର୍ଶନ ସମୟରେ ମନ୍ତ୍ରୀ ପ୍ରଥମେ ଥାନା ବାହାରେ ଲାଗିଥିବା ‘ମୋ ସରକାର’ ବୋର୍ଡ ଦେଖିଥିଲେ । ପରେ ରିସେପ୍ସନ୍ ଡେସ୍କକୁ ଯାଇ ଏଠାକୁ ଅଭିଯୋଗ କରିବାକୁ ଆସୁଥିବା ଲୋକଙ୍କୁ କିପରି ସେବା ଯୋଗାଇ ଦିଆଯାଉଛି ସେ ବିଷୟରେ ଦାୟିତ୍ୱରେ ଥିବା ପୋଲିସ୍ କର୍ମଚାରୀଙ୍କଠାରୁ ପଚାରି ବୁଝିଥିଲେ । ଏଥି ସହ ମନ୍ତ୍ରୀ ଅଭିଯୋଗର ରେଜିଷ୍ଟର ଦେଖିବା ସହ ଆଜି ହୋଇଥିବା ଅଭିଯୋଗ ରିପୋର୍ଟ ମାଗି ଦେଖିଥିଲେ । ମହିଳା ଅଭିଯୋଗକାରିଣୀଙ୍କ ଲାଗି ଥାନା ପକ୍ଷରୁ କିଭଳି ବ୍ୟବସ୍ଥା ହୋଇଛି ଜାଣିବାକୁ ଚାହିଁଥିଲେ । ଯଦି ମହିଳା ଜଣଙ୍କ ଯୌନ ନିର୍ଯାତନା ସଂପର୍କରେ କୌଣସି ଅଭିଯୋଗ ନେଇ ଆସିଥାନ୍ତି ତେବେ ତାଙ୍କୁ ନିଶ୍ଚିତ ଭାବେ ଜଣେ ମହିଳା ପୋଲିସ କର୍ମଚାରୀଙ୍କ ଦ୍ୱାରା କାଉନ୍ସେଲିଂ କରାଯାଇଥାଏ
ବୋଲି ଥାନା ଅଧିକାରୀ ମନ୍ତ୍ରୀଙ୍କୁ ସୂଚନା ଦେଇଥିଲେ । ଏଥି ସହିତ ମନ୍ତ୍ରୀ ଗତବର୍ଷ ତୁଳନାରେ ଚଳିତ ବର୍ଷ କେତେ ଅଭିଯୋଗ ଆସିଛି ତାର ହିସାବ ଥାନା ଅଧିକାରୀଙ୍କୁ ମାଗିଥିଲେ । 
ମନ୍ତ୍ରୀ କ୍ୟାପ୍ଟେନ୍ ମିଶ୍ର ହାଜତ ବୁଲି ଦେଖିବା ସହ ହାଜର ଅପମୃତୁ୍ୟକୁ ପ୍ରୋତ୍ସାହିତ କରିବା ଭଳି କୌଣସି ସରଞ୍ଜାମ ଅଭିଯୁକ୍ତଙ୍କଠାରୁ ଦୂରେଇ ରଖିବା ଉପରେ ଗୁରୁତ୍ୱ ଦେଇଥିଲେ । ଏଥି ସହ ନାଇଟ୍ ପାଟ୍ରୋଲିଂ ବ୍ୟବସ୍ଥା ଏବଂ ଥାନାରେ ସିସିଟିଭି ବ୍ୟବସ୍ଥାର ତଦାରଖ କରିଥିଲେ । ମୁଖ୍ୟମନ୍ତ୍ରୀଙ୍କ ୫‘ଟି’ ସୂତ୍ର ଥାନାରେ କେତେ କାର୍ଯ୍ୟକାରୀ ହେଉଛି ସେ ସଂପର୍କରେ ମନ୍ତ୍ରୀ କ୍ୟାପ୍ଟେନ୍ ମିଶ୍ର ତଦାରଖ କରିଥିଲେ । ସମସ୍ତ ପୋଲିସ କର୍ମଚାରୀ ନିଜକୁ ସବୁବେଳେ ଫିଟ୍ ରଖିବା ପାଇଁ କହିବା ସହ ପ୍ରତ୍ୟେକ ସପ୍ତାହରେ ଶାରୀରିକ ଶିକ୍ଷା ପ୍ରଶିକ୍ଷଣ କରିବା ପାଇଁ ସେ ପରାମର୍ଶ ଦେଇଥିଲେ । ଏହି ପରିଦର୍ଶନ ସମୟରେ ପୂର୍ବତନ ବିଧାୟକ ତଥା ‘ମୋ କଲେଜ’ର ଉପଦେଷ୍ଟା ଶ୍ରୀ ଆକାଶ ଦାସ ନାୟକ ସ୍ଥାନୀୟ ସାଂସଦଙ୍କ ପ୍ରତିନିଧିଙ୍କ ସମେତ ଥାନା ଅଧିକାରୀ ଶକୁନ୍ତଳା ପତି ଏବଂ ଅନ୍ୟ ସମସ୍ତ ପୁଲିସ ଅଧିକାରୀ ଏବଂ କର୍ମଚାରୀ ଉପସ୍ଥିତ ଥିଲେ ।
