ବାରିପଦା(ନିରପେକ୍ଷ ଖବର)ତା-୫/ଜାନୁଆରୀ/୨୦୨୦-ପାଣି ପିଇବା ବାହାନାରେ ଆସି ସମ୍ପର୍କୀୟ ନାବାଳିକା ଭଉଣୀକୁ ଦୁଷ୍କର୍ମ କରି ଅଭିଯୁକ୍ତ ଭାଇ ଜେଲ ଯାଇଛି। ହେଲେ ଦୁଷ୍କର୍ମରେ ଶିକାର ହୋଇଥିବା ଭଉଣୀ ଆଉ ତାର ପରିବାର ମୁଣ୍ଡରେ ଲାଗିଥିବା କଳଙ୍କର ଟୀକା ପିଛା ଛାଡିନି।
ସମ୍ପକୀୟ ଭାଇ ଦ୍ୱାରା ଦୁଷ୍କର୍ମରେ ଶିକାର ହେବା ପରେ ନାବାଳିକା ଝିଅଟି ୬ ମାସର ଅନ୍ତସତ୍ତ୍ଵା ହୋଇ ଅପବାଦ ଓ କଳଙ୍କ ମୁଣ୍ଡାଇ ଘୁରି ବୁଲୁଛି। ନାବାଳିକା ପେଟରେ ବଢୁଥିବା ସନ୍ତାନଟିକୁ ଜନ୍ମ ଦେବ କି ନାହିଁ ପରିବାର ଲୋକ ଚିନ୍ତାରେ ପଡ଼ିଛନ୍ତି। ନାବାଳିକା ଝିଅଟିର ବୟସ ୧୬ ବର୍ଷ ହୋଇଥିବା ବେଳେ ତାର ଦୁର୍ବଳ ଚେହେରା ପାଇଁ ତା ପେଟରେ ବଢୁଥିବା ସନ୍ତାନଟିକୁ ବଞ୍ଚାଇବ ନା ତାକୁ ନଷ୍ଟ କରିବ ସେ କିଛି ଜାଣି ପାରୁନି। ସନ୍ତାନଟି ଜନ୍ମ ହେବାପରେ କେଉଁ ପରିଚୟ ନେଇ ସେ ବାଟ ଚାଲିବ ତାହା ତାକୁ ବିଚଳିତ କରିପକାଉଛି। ସେପଟେ ଅଭିଯୁକ୍ତ ଭାଇକୁ ବେତନଟୀ ପୁଲିସ ସିନା ଜେଲ ପଠାଇ ଦେଇଛି। ହେଲେ ଅନ୍ତସତ୍ତ୍ଵା ବନିଥିବା ନାବାଳିକାର ରକ୍ଷଣାବେକ୍ଷଣ ଦାଇତ୍ୱ କିଏ ନେବ ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି। କାରଣ ପୁଲିସ ଏହି ନାବାଳିକାର ଯତ୍ନ ନ ନେଇ ସେମିତି ଛାଡି ଦେଇଥିବା ବେଳେ ଉଭୟ ମାଆ ଓ ଛୁଆର ଜୀବନ ପ୍ରତି ବିପଦ ଥିବା ଡାକ୍ତର କହୁଛନ୍ତି। ଅଳ୍ପ ବୟସରେ ନାବାଳିକା ଜଣଙ୍କ ଗର୍ଭବତୀ ହୋଇଥିବାରୁ ଡାକ୍ତର ତାର ଚିକିତ୍ସା କରିବାକୁ ମନା କରୁଥିବା ତାର ମାଆ ଅଭିଯୋଗ ଆଣିଛନ୍ତି।
ଏଭ ଏକ ହୃଦୟ ବିଦାରକ ଘଟଣା ଘଟିଛି ମୟୁରଭଞ୍ଜ ଜିଲ୍ଲାର ବେତନଟୀ ଅଞ୍ଚଳରେ। ସୂଚନା ମୁତାବକ ଗତ ୬ ମାସ ତଳେ ଘରେ କେହି ନଥିବା ସମୟରେ ସମ୍ପକୀୟ ଭାଇ ଅଭିଜିତ ବେହେରା ପାଣି ପିଇବା ବାହାନାରେ ଆସି ଏହି ନାବାଳିକା ଜଣଙ୍କୁ ଦୁଷ୍କର୍ମ କରିଥିଲା। ଦୁଷ୍କର୍ମ କରିବା ପରେ ଏ ବିଷୟରେ କାହାରିକୁ କିଛି କହିଲେ ତାକୁ ଜୀବନରୁ ମାରିଦେଵ ବୋଲି ଧମକ ବି ଦେଇଥିଲା। ଫଳରେ ଝିଅଟି ଦୁଷ୍କର୍ମରେ ଶିକାର ହୋଇଥିଲେ ମଧ୍ୟ ଭୟରେ କାହାରିକୁ କିଛି କହି ନ ଥିଲା। ଏହି ଘଟଣାର ଦୀର୍ଘ ୬ମାସ ପରେ ଝିଅଟି ଯେତେବେଳେ ଗର୍ଭବତୀ ଥିବା ଜଣାପଡିଲା।ସେତେବେଳେ ପରିବାର ଲୋକ ଏନେଇ ଗତ ଡିସେମ୍ବର ୨୬ ତାରିଖରେ ବେତନଟୀ ଥାନାରେ ଅଭିଯୋଗ କରିଥିଲେ। ଅଭିଯୋଗ ଅନୁସାରେ ବେତନଟୀ ପୋଲିସ ଅଭିଯୁକ୍ତ ଅଭିଜିତ ବେହେରାକୁ ଗିରଫ କରି କୋର୍ଟ ଚାଲାଣ କରିଥିଲା। ହେଲେ ଦିନ ମଜୁରିଆ ଭାବେ କାମ କରୁଥିବା ନାବାଳିକା ଝିଅର ବାପା ଓ ମାଆଙ୍କ ଦୁଃଖ କିଏ ବୁଝିବ ତାହା ଏବେ ବଡ଼ ପ୍ରଶ୍ନ ହୋଇ ଛିଡା ହୋଇଛି।
