ପୁଣି ଚର୍ଚ୍ଚାରେ ବିଜେଡ଼ି ରାଜ୍ୟସଭା ସାଂସଦ ସରୋଜିନୀ ହେମ୍ରମ…

ବାରିପଦା(ନିରପେକ୍ଷ ଖବର)ତା-୨୮/ନଭେମ୍ବର/୨୦୧୯-ରାଜ୍ୟସଭା ଶୀତକାଳୀନ ଅଧୀବେଶନରେ ଶିମିଳିପାଳ ବ୍ୟାଘ୍ର ସଂରକ୍ଷଣରେ ରୋପ-ୱେ ନିର୍ମାଣ ଏବଂ ପର୍ଯ୍ୟଟନ ବିକାଶ ପାଇଁ ଆଜି ପୁଣି ଦାବି କଲେ ବିଜୁ ଜନତା ଦଳର ରାଜ୍ୟସଭା ସାଂସଦ ସରୋଜିନୀ ହେମ୍ବମ। ବାଚସ୍ପତିଙ୍କ ଧ୍ୟାନ ଆକର୍ଷଣ କରି କରି ଶ୍ରୀମତୀ ହେମ୍ରମ କହିଛନ୍ତି ଯେ, ଓଡ଼ିଶାର ଶିମିଳିପାଳ ଅଭୟାରଣ୍ୟ ଆଦିବାସୀ ବହୁଳ ମୟୁରଭଞ୍ଜ ଜିଲ୍ଲାରେ ଅବସ୍ଥାପିତ ରହିଛି। ହେଲେ ଏଠାରେ ଜୈବ୍ୟ ପରିବେଶ ସଂରକ୍ଷଣ ଯୋଗୁଁ ଏହି ଜିଲ୍ଲାରେ ଏ ପର୍ଯ୍ୟନ୍ତ ଶିଳ୍ପର ବିକାଶ ହୋଇପାରିନାହିଁ । ଏହା ବଦଳରେ ସେଠାରେ ପର୍ଯ୍ୟଟର ବିକାଶ ନିତାନ୍ତ ଜରୁରୀ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଅଭୟାରଣ୍ୟର ବିକାଶ ପାଇଁ ଅନେକ ପଦକ୍ଷେପ ଗ୍ରହଣ କରିଛନ୍ତି । ସବୁ ଋତୁକୁ ସୁହାଇଲା ଭଳି ରାସ୍ତା ନିର୍ମାଣ କରିବା ଅସମ୍ଭବ ହେତୁ ରୋପ-ୱେ କୁ ଗୁରୁତ୍ୱ ଦେବା ଆବଶ୍ୟକ ବୋଲି କହିଥିଲେ। ଏହି ଅଭୟାରଣ୍ୟରେ ଅନେକ ଔଷଧୀୟ ବୃକ୍ଷ ସାଙ୍ଗକୁ ଟସର ଉତ୍ପାଦନ ମଧ୍ୟ ହେଉଛି । ତେଣୁ ଏହାର ଗମନାଗମନର ସଠିକ ଉନ୍ନତିକରଣ କରାଗଲେ ଅନେକ ନିଯୁକ୍ତି ସୃଷ୍ଟି ହୋଇପାରିବା ସହ ରାଜସ୍ବ ବୃଦ୍ଧି ହୋଇପାରିବ ବୋଲି ବାଚସ୍ପତିଙ୍କ ନିକଟରେ ଦାବି କରିଥିଲେ । ସେହିପରି ମୟୁରଭଞ୍ଜ ଜିଲ୍ଲା ବେତନଟୀ ରେଲୱେ ଷ୍ଟେସନରୁ ଜବରଦଖଲ ଦୋକାନୀଙ୍କୁ ଉଚ୍ଛେଦ କରିବା ଉପରେ ମଧ୍ୟ୍ୟ ସେ ଗୁରୁତ୍ୱାରୋପ କରିଥିଲେ। ରାଜ୍ୟସଭା ସାଂସଦ ଶ୍ରୀମତୀ ହେମ୍ରମ ରାଜ୍ୟ ତଥା ମୟୁରଭଞ୍ଜ ଜିଲ୍ଲାର ବିଭିନ୍ନ ପ୍ରସଙ୍ଗ ଉଠାଇ ସବୁବେଳେ ଚର୍ଚ୍ଚାରେ ରହି ଆସୁଥିଲେ। ରାଜ୍ୟସଭାରେ ତାଙ୍କର ଆଉ ମାତ୍ର ଦୁଇ ମାସ କାର୍ଯ୍ୟକାଳ ବାକି ଥିବାବେଳେ ପୁଣି ଥରେ ଶିମିଳିପାଳ ଅଭୟାରଣ୍ୟ ପ୍ରସଙ୍ଗ ଉଠାଇ ଜିଲ୍ଲାବାସୀଙ୍କ ମନ କିଣିଛନ୍ତି।