ବାରିପଦା(ନିରପେକ୍ଷ ଖବର)ତା-୨୨/୦୨/୨୦୨୦-
ସାଧାରଣତଃ ବିଭିନ୍ନ ସମୟରେ ଅନେକ କମ୍ପାନୀ ଓ ସେମାନଙ୍କର କର୍ମଚାରୀମାନଙ୍କ ଦ୍ବାରା ଗ୍ରାହକମାନେ ଠକାମିରେ ଶିକାର ହୋଇଥାଆନ୍ତି।
ହେଲେ ଗତ ୧୭ ତାରିଖରେ ବାରିପଦା ଟାଉନ୍ ଥାନା ଅଞ୍ଚଳରେ ଘଟିଥିବା ଏମିତି ଏକ ଘଟଣା ଯାହା ସମସ୍ତଙ୍କୁ ଚକିତ କରିଦେବ। କମ୍ପାନୀ ଠକିବା ବଦଳରେ ଜଣେ ଗ୍ରାହକ ୨ ଲକ୍ଷରୁ ଅଧିକ ଟଙ୍କା କମ୍ପାନୀ ଓ ତାର ଡେଲିଭରି ବୟକୁ ଚୂନ ଲଗାଇ ଚମ୍ପଟ ମାରିଥିଲା। ଏନେଇ ଡେଲିଭରି ବୟ ଜଣଙ୍କ ଥାନାରେ ଅଭିଯୋଗ କରିଥିବା ବେଳେ ପୁଲିସ୍ ଅଭିଯୁକ୍ତମାନଙ୍କୁ ଧରିବା ପାଇଁ ଯାଜପୁର ଓ ଭୁବନେଶ୍ବର ଚଢାଉ କରି ଦୁଇ ଅଭିଯୁକ୍ତଙ୍କୁ କାବୁ କରି ଆଜି ରାତିରେ ବାରିପଦା ଆଣୁଥିବା ଜଣାପଡିଛି। ଘଟଣାଟି ଥିଲା ଏମିତି, ଆସନ୍ତୁ ଜାଣିବା…. ବାରିପଦା ଅଞ୍ଚଳର ମନୋଜ କୁମାର ନାମକ ଜଣେ ବ୍ୟକ୍ତି ବିଭିନ୍ନ ଆଇଡି ଦେଇ ଗୋଟିଏ ମୋବାଇଲ ନମ୍ବରରେ ଏକ କମ୍ପାନୀରୁ ୧୦ଟି ମୋବାଇଲ ଫୋନ ଅର୍ଡର କରିଥିଲେ । ଯାହାର ମୂଲ୍ୟ ୩ ଲକ୍ଷ ଟଙ୍କାରୁ ଅଧିକ ହେବ। ଅର୍ଡର ମୁତାବକ କମ୍ପାନୀ ମଧ୍ୟ ମନୋଜଙ୍କ ନିକଟକୁ ପାର୍ସଲ ଡେଲିଭରି ବୟ ହାତରେ ୧୦ଟି ପାର୍ସଲ ପଠାଇଥିଲେ। ଗତ ୧୭ ତାରିଖ ଦିନ ଡେଲିଭରି ବୟ ଦେବବ୍ରତ ପଲେଇ ସ୍ଥାନୀୟ ମାଆ ଅମ୍ବିକା ମନ୍ଦିର ନିକଟରେ ପହଞ୍ଚି ମନୋଜକୁ ୧୦ଟି ପାର୍ସଲ ଦେଇଥିଲେ। ମନୋଜ ଡେଲିଭରି ବୟ ଦେବବ୍ରତ ପାଖରେ ତାଙ୍କ ଭାଇକୁ ଛିଡା କରିଦେଇ ୧୦ଟି ଯାକ ପାର୍ସଲ ନେଇ ଅଧଘଣ୍ଟାଏ ଅପେକ୍ଷା କରିବାକୁ କହିଥିଲେ। କିଛି ସମୟ ଅପେକ୍ଷା କରିବା ପରେ ପୁଣି ମନୋଜ ଆସି ଦେବବ୍ରତଙ୍କୁ ୮ଟି ପାର୍ସଲ ଫେରାଇ ଦେଇ ୨ଟି ପାର୍ସଲ ନେଇ ୪୨ ହଜାର ଟଙ୍କା ଦେଇଥିଲେ।
ଆଉ ତାଙ୍କୁ କହିଥିଲେ ଅବଶିଷ୍ଟ ପଇସା ୮ଟି ପାର୍ସଲ ନେଲେ ଦେଇଦେବି। ଏହାପରେ ପାର୍ସଲ ବୟ ଦେବବ୍ରତ ଫେରସ୍ତ ୮ଟି ପାର୍ସଲକୁ ନେଇ କମ୍ପାନୀ ପାଖରେ ଦିପୋଜିଟ କରିଥିଲେ। କମ୍ପାନୀର କର୍ମଚାରୀମାନେ ଫେରସ୍ତ ପାର୍ସଲକୁ ଯାଞ୍ଚ କରିବା ପରେ ସେଥିରୁ ମୋବାଇଲ ବାହାରିବା ବଦଳରେ ସାବୁନ ଆଦି ବାହାରିଥିଲା। ଏନେଇ ପାର୍ସଲ ବୟ ଦେବବ୍ରତ ଟାଉନ୍ ଥାନାରେ ଅଭିଯୋଗ କରିଥିଲେ । ଅଭିଯୋଗ ଅନୁଯାୟୀ ପୁଲିସ୍ ଗତ ଫେବ୍ରୁଆରୀ ୧୦ ରେ ଏକ ମାମଲା ରୁଜୁ କରି ଅଭିଯୁକ୍ତ ମନୋଜ କୁମାରର ମୋବାଇଲ ଫୋନ ଟ୍ରାକ କରିଥିଲା। ମୋବାଇଲ ଟ୍ରାକିଂରେ ଅଭିଯୁକ୍ତମାନେ ଯାଜପୁର ଓ ଭୁବନେଶ୍ବରରେ ଲୁଚି ରହିଥିବା ଜାଣିବାକୁ ପାଇଥିଲା ପୋଲିସ। ଏହାପରେ ପୁଲିସର ଏକ ପ୍ରତିନିଧି ଦଳ ଯାଜପୁର ଓ ଭୁବନେଶ୍ବରର ବିଭିନ୍ନ ସ୍ଥାନରେ ଚଢାଉ କରି ଶନିବାର ଅଭିଯୁକ୍ତମାନଙ୍କୁ ଧରିବାରେ ସକ୍ଷମ ହୋଇଥିବା ପୋଲିସ ପକ୍ଷରୁ ସୂଚନା ମିଳିଛି।
