ବିଧାନସଭାରେ ସ୍ୱାସ୍ଥ୍ୟମନ୍ତ୍ରୀଙ୍କ ମିଥ୍ୟା ଉତ୍ତର ପ୍ରସଙ୍ଗ

ବାରିପଦା(ନିରପେକ୍ଷ ଖବର)ତା-୨୮/ନଭେମ୍ବର/୨୦୧୯-ସ୍ୱାସ୍ଥ୍ୟ ଓ ପରିବାର କଲ୍ୟାଣର ବିଭାଗୀୟ ମନ୍ତ୍ରୀ ଶ୍ରୀ ନବ କିଶୋର ଦାସ ପ୍ରଦତ୍ତ ଉତ୍ତର ମିଥ୍ୟା ଜାଣି ବିଧାନସଭା ବାଚସ୍ପତିଙ୍କ ଜରିଆରେ ବଡ଼ସାହି ବିଧାୟକ ସନାତନ ବିଜୁଳି ବିଶେଷ ଅଧିକାର କ୍ଷୂର୍ଣ୍ଣ ପ୍ରସ୍ତାବ(ପ୍ରିଭିଲେଜ ମୋସନ) ନୋଟିସ ଆଗତ କରିଛନ୍ତି। ବିଧାନସଭା ରେକର୍ଡ଼ରୁ ଉତ୍ତର ସମ୍ପର୍କିତ ତଥ୍ୟ ବାଦ ଦେବା ସାଙ୍ଗକୁ ସଠିକ ଉତ୍ତର ଲିପିବଦ୍ଧ ପୂର୍ବକ ତାଙ୍କୁ ପ୍ରଦାନ କରାଯାଉ ବୋଲି ସେ ବାଚସ୍ପତିଙ୍କୁ ଜଣାଇଥିବା ନେଇ ବିଧାୟକ ଶ୍ରୀ ବିଜୁଳି ଆମ ପ୍ରତିନିଧିଙ୍କୁ ଏ ସମ୍ପର୍କରେ ଅବଗତ କରିଛନ୍ତି।ଶୀତକାଳୀନ ବିଧାନସଭାର ପ୍ରଶ୍ନକାଳ ସମୟରେ ବଡ଼ସାହି ବିଧାୟକ ସନାତନ ବିଜୁଳି ୨୮୦ନଂ ପ୍ରଶ୍ନରେ ଏହି ଡ଼ାକ୍ତରଖାନାର ବିଶେଷଜ୍ଞ ଡାକ୍ତରଙ୍କର ସ୍ଥିତି ସମ୍ପର୍କରେ ପ୍ରଶ୍ନ ପଚାରିଥିଲେ। ଏହାକୁ ନେଇ ସ୍ୱାସ୍ଥ୍ୟ ଓ ପରିବାର କଲ୍ୟାଣର ବିଭାଗୀୟ ମନ୍ତ୍ରୀ ଉତ୍ତରରେ ୪ଜଣ ବିଶେଷଜ୍ଞ ଡାକ୍ତର କାର୍ଯ୍ୟ କରୁଛନ୍ତି ବୋଲି ତଥ୍ୟ ପ୍ରଦାନକୁ ନେଇ ବିବାଦୀୟ ହୋଇଛନ୍ତି। ବଡସାହି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ବର୍ତ୍ତମାନ ୩ଜଣ ଡ଼ାକ୍ତର କାର୍ଯ୍ୟ କରୁଛନ୍ତି। ସମସ୍ତେ ନବାଗତ ଏମ୍‍.ବି.ବି.ଏସ୍‍ ଡାକ୍ତର ଏଠାରେକାର୍ଯ୍ୟକରୁଥିବା  ବେଳେ ମୁଖ୍ୟ ଚିକିତ୍ସାଧିକାରୀଙ୍କ ଦାୟିତ୍ୱରେ ଥିବା ଡାକ୍ତର ସଞ୍ଜିବ କୁମାର ବଇତାଇ ଶାକୁଆ ପିଏଚସିରୁ ଡେପୁଟେସନରେ ଆସି ଅତିରିକ୍ତ ଦାୟିତ୍ୱ ତୁଲାଉଛନ୍ତି। ସରକାରଙ୍କ ନିୟମ ଅନୁଯାୟୀ ଏଠାରେ ମୁଖ୍ୟ ଚିକିତ୍ସାଧୀକାରୀଙ୍କୁ ମିଶାଇ ସ୍ତ୍ରୀ ଓ ପ୍ରସୂତୀ, ଶିଶୁ ରୋଗ, ଭେଷଜ ଏବଂ ଶଲ୍ୟ ବିଶେଷଜ୍ଞ ଡାକ୍ତରଙ୍କୁ ମିଶାଇ ୬ଜଣ ଡାକ୍ତର ରହିବା କଥା। କିନ୍ତୁ ଏଠାରେ ଜୁନ ୨୦୧୩ ରୁ ଭେଷଜ, ଏପ୍ରିଲ ୨୦୧୫ ରୁ ଶିଶୁ ରୋଗ, ଜୁନ ୨୦୧୫ ରୁ ଶଲ୍ୟ ବିଶେଷଜ୍ଞ ଓ ଅଗଷ୍ଟ ୨୦୧୬ ରୁ ସ୍ତ୍ରୀ ଓ ପ୍ରସୂତୀ ବିଶେଷଜ୍ଞ ଡ଼ାକ୍ତର ପଦବୀ ଖାଲି ରହିଛି।ରୋଗୀକଲ୍ୟାଣ ସମିତି ସଦସ୍ୟ ରାଜେନ୍ଦ୍ର କୁମାର ଜେନା ମଧ୍ୟ ମନ୍ତ୍ରୀଙ୍କ ମିଥ୍ୟା ଉତ୍ତରକୁ ସମାଲୋଚନା କରି ବିଧାୟକଙ୍କ ପଦକ୍ଷେପକୁ ପ୍ରଶଂସା କରିଛନ୍ତି। ସୂଚନାଅନୁଯାୟୀ ବଡ଼ସାହି ବ୍ଲକ କଂଗ୍ରେସ ପକ୍ଷରୁ ସଭାପତି ଗୁଣନିଧି ମହାନ୍ତି, ମନୋରଞ୍ଜନ ବଳା, ଶଶାଙ୍କ ଶେଖର କର, ଖଗେଶ୍ୱର ନାୟକ, ଶ୍ରୀଧର ବାରିକ, ବିହାରୀ ଲାଲ ବେହେରା ପ୍ରମୁଖ ବୁଧବାର ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କ ଉଦେଶ୍ୟରେ ସ୍ମାରକ ପତ୍ର ପ୍ରଦାନ ପୂର୍ବକ ଆନ୍ଦୋଳନ ଚେତାବନୀ ଦିଆଯାଇଛି। ମାନ୍ୟବର ସରକାରଙ୍କ 5ଟି ସ୍ୱଚ୍ଛ ଶାସନ, ବିଭାଗ ମଧ୍ୟରେ ଥିବା ସ୍ୱଚ୍ଛତା ମାନ୍ୟବର ସ୍ୱାସ୍ଥ୍ୟ ମନ୍ତ୍ରୀଙ୍କ ବିବୃତିରୁ ସ୍ପଷ୍ଟ ହେଉଛି ବୋଲି ମଧ୍ୟ ଉକ୍ତ ପତ୍ରରେ ସାମିଲ ରହିଛି । ତେବେ ଅଞ୍ଚଳବାସୀଙ୍କ ତଥା ବୁଦ୍ଧିଜୀବୀଙ୍କ ବହୁଦିନର ଦାବି ଓ ସମସ୍ୟାକୁ ତୁରନ୍ତ ପଦକ୍ଷେପ ନେଇ ସମାଧାନ କରିବାକୁ ମଧ୍ୟ ଦାବି ରହିଛି ।