ବାଇକରେ ଲିଫ୍ଟ ଦେବା ବାହାନାରେ ଜଂଗଲରେ ଯୁବତୀକୁ ବଳାତ୍କାର…

ବାରିପଦା,ନିରପେକ୍ଷ ଖବର:୨୪/୦୭/୨୦୧୯: ଆଜି ସମସ୍ତ ସାକ୍ଷ୍ୟ ପ୍ରମାଣକୁ ଭିତ୍ତି କରି ଜଣେ ଯୁବତୀକୁ ବଳାତ୍କାର କରିଥିବା ଅଭିଯୁକ୍ତକୁ ୭ ବର୍ଷ ଜେଲ ଦଣ୍ଡ ସହିତ ୫ ହଜାର ଟଙ୍କା ଜୋରିମାନା ଏବଂ ଅନାଦେୟ ଅଧିକ ୬ ମାସ ଜେଲ ଦଣ୍ଡ ଶୁଣାଇଛନ୍ତି ସ୍ୱତନ୍ତ୍ର ଫାଷ୍ଟଟ୍ରାକ କୋର୍ଟର ବିଚାରପତି ଶାନ୍ତନୁ କୁମାର ଦାସ । ରାୟ ପ୍ରକାଶ ପାଇବା ପରେ ଅଭିଯୁକ୍ତକୁ ବାରିପଦା ମଣ୍ଡଳ କାରଗାରକୁ ପଠାଇ ଦିଆଯାଇଛି । ଅଭିଯୁକ୍ତ ଜଣକ ହେଲେ ମୋରଡା ଅଞ୍ଚଳର ସଞ୍ଚିତ କୁମାର ଜେନା | କୋର୍ଟରୁ ମିଳିଥିବା ସୂଚନା ମୁତାବକ ୨୦୧୭ ମସିହା ଡିସେମ୍ବର ୨୫ ତାରିଖରେ ଜଣେ ୨୩ ବର୍ଷୀୟ ଯୁବତୀ ନିଜ ଘର ମୋରଡାକୁ ଯିବା ପାଇଁ ବାରିପଦା ବସଷ୍ଟାଣ୍ଡରେ ଅପେକ୍ଷା କରିଥିଲା । ଠିକ୍ ଏହି ସମୟରେ ଜଣେ ଅଚିହ୍ନା ଯୁବକ ସଞ୍ଜିତ କୁମାର ଜେନା ବାଇକରେ ତାକୁ ଲିଫ୍ଟ ଦେଇ ଘର ପାଖରେ ଛାଡି ଦେବ ବୋଲି କହିଥିଲା। ଯୁବତୀ ଜଣଙ୍କ ତାକୁ ବିଶ୍ୱାସ କରି ବାଇକରେ ଯାଇଥିଲେ । ରାସ୍ତାରେ ଯାଉଥିବା ବେଳେ ଅଧାବାଟରେ ସେ ଏମ୍‌ଭିଆଇ ଚେକିଂ ହାବୁଡ଼ରେ ପଡ଼ିଥିଲେ। ମେଡିକାଲକୁ ଯାଉଥିବା କହି ସଞ୍ଜିତ ଏମଭିଆଇ କବଳରୁ ଖସି ଆସି ବାଲିଆଶୁଳୀ ଜଙ୍ଗଲ ମଧକୁ ବାଇକ ନେଇଯାଇଥିଲା । ଜଙ୍ଗଲ ଭିତରେ ଯୁବତୀକୁ ଭୁଜାଲି ଦେଖାଇ ଜୋରଜବରଦସ୍ତ ବଳାତ୍କାର କରି ଯୁବତୀଙ୍କ ଭେନିଟିରେ ଥିବା ସୁନାଗହଣା ,ଟଙ୍କା ପଇସା ସବୁ ଛଡାଇ ନେଇ ଚମ୍ପଟ ମାରିଥିଲା । ଯୁବତୀ ଜଣଙ୍କର ଚେତା ଫେରିବା ପରେ ଜଙ୍ଗଲ ବାହାରକୁ ଆସି ପରିବାର ଲୋକଙ୍କୁ ଫୋନ କରିଥିଲା । ମାନସିକ ଯନ୍ତ୍ରଣାରେ ଯୁବତୀ ଜଣଙ୍କ ରହିଥିବାରୁ ଏନେଇ ୨୦୧୮ ମସିହା ଜାନୁଆରୀ ୪ ତାରିଖରେ ମୋରଡା ଥାନାରେ ଏତଲା ଦେଇଥିଲେ । ଏତଲା ମୁଳେ ପୁଲିସ୍ ଅଭିଯୁକ୍ତକୁ ଧରିବା ପାଇଁ ଅନୁସନ୍ଧାନ କରି ଏମଭିଆଇ ତାଲିକାରେ ଥିବା ଗାଡି ନମ୍ବରକୁ ରୁଜୁ କରି ଆସାମୀ ପାଖରେ ପହଞ୍ଚିବାରେ
ସକ୍ଷମ ହୋଇଥିଲା । ଘରେ ଥିବା ବେଳେ ଆସାମୀ ସଞ୍ଜିତ କୁମାର ଜେନାକୁ ଗିରଫ କରି ପୁଲିସ୍ ବିଚାର ବିଭାଗୀୟ ଅଦାଲତକୁ ପଠାଇ ଦେଇଥିଲା । ବୁଧବାର ଏହି ମାମଲାର ଶୁଣାଣି କରି ମାନ୍ୟବର ବିଚାରପତି ୩୭୬ ଆଇପିସି ଧାରାରେ ୭ ବର୍ଷ ଜେଲ ଦଣ୍ଡ ସହ ୫ ହଜାର ଟଙ୍କା ଜୋରିମାନା ଏବଂ ଅନାଦେୟ ଅଧିକ ୬ ମାସ ଜେଲ ଦଣ୍ଡ ଭୋଗିବାକୁ ନିର୍ଦ୍ଦେଶ ଦେଇଛନ୍ତି । ସେହିପରି ୩୯୨ ଆଇପିସି ଧାରାରେ ୫ ବର୍ଷ ଜେଲ ଦଣ୍ଡ ସହ ୫ ହଜାର ଟଙ୍କା ଜୋରିମାନା ଏବଂ ଅନାଦେୟ ଅଧିକ ୬ ମାସ ଜେଲ ଦଣ୍ଡ ଭୋଗିବାକୁ ନିର୍ଦ୍ଦେଶ ଦେଇଛନ୍ତି । ତେବେ ନିୟମ ମୁତାବକ ସର୍ବାଧିକ ୭ ବର୍ଷ ଜେଲ ଏବଂ ୫ ହଜାର ଟଙ୍କା ଜୋରିମାନା ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଏହି ମାମଲାରେ ସରକାରଙ୍କ ପକ୍ଷରୁ ନିତ୍ୟାନନ୍ଦ ବେହେରା କେସ ପରିଚାଳନା କରୁଥିଲେ । ବଳାତ୍କାର ମାମଲାରେ ଦୋଷୀ ସାବ୍ୟସ୍ତ ହୋଇଥିବା ସଞ୍ଜିତ କୁମାର ଜେନାଙ୍କ ବିରୋଧରେ ଅନ୍ୟ ଏକ ବଳାତ୍କାର ମାମଲାରେ ଅତିରିକ୍ତ ସେସନ ଜଜ୍ କମ୍ ସ୍ପେସଲ ଟ୍ରାକ୍‌ କୋର୍ଟ ଦୋଷୀ ସାବ୍ୟସ୍ତ କରିଥିଲେ । ଯାହା ଏବେ ହାଇକୋର୍ଟରେ ବିଚାରଧିନ ଥିବା ସରକାରୀ ଓକିଲ ଶ୍ରୀ ବେହେରା ସୂଚନା ଦେଇଛନ୍ତି ।